Əyyub Allaş: “Qarabağ”la həm çempionat, həm də kubok oyunu bizim üçün vacibdir”

“Bizi “Qarabağ”a qarşı çox çətin oyun gözləyir. Rəqibin gücü məlumdur. Bununla belə, meydana yaxşı nəticə qazanmaq üçün çıxacağıq”.

Futbolxeber.az saytına açıqlamasında bu sözləri “Araz-Naxçıvan”ın yarımmüdafiəçisi Əyyub Allaş deyib.

Belçikalı “Qarabağ”a qarşı keçiriləcək həm kubok, həm də çempionat oyununun komandası üçün vacib olduğunu bildirib: “Mən daha əvvəl “Qəbələ” ilə Azərbaycan kubokunun qalibi olmuşam. Kuboku qazanmaq gözəl hissdir. Eyni hissləri “Araz-Naxçıvan”la da yaşamaq istəyirəm. Ona görə də “Qarabağ”la həm çempionat, həm də kubok oyunu bizim üçün vacibdir”.

27 yaşlı futbolçu ötən tur “Sabah”a qarşı keçirdikləri matçdan (2:2) da söz açıb: “Çətin oyun oldu. Qalib gələ bilərdik. Əlimizdən gələnin ən yaxşısını etdik. İki dəfə hesabda geri düşsək də, təslim olmadıq. Sona qədər mübarizə apardıq. Təəssüf ki, qələbə qolunu vura bilmədik”.

Fərəc Aslanov