Elmar Baxşıyev: “Kim deyir ki, “Araz-Naxçıvan” enişdədir?”

“Yaxşı, maraqlı, dinamik oyunun şahidi olduq. Hər iki komanda meydançada daha çox hücum kreativliyi ilə seçilirdi. Komandanın göstərdiyi performansdan məmnun qaldım. Yolumuza davam edirik. Bu gün yaxşı oyun göstərərək, bir xal qazandıq”.

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Elmar Baxşıyev Azərbaycan Premyer Liqasının XXV turunda “Sabah”la heç-heçə (2:2) etdikləri oyundan sonra deyib.

Daha sonra o, jurnalistlərin suallarını cavablandırıb:

- Bir xalla "Araz-Naxçıvan"ın enişdən çıxdığını demək olar?

- Biz enişdə deyildik. Kim deyir ki, "Araz-Naxçıvan" enişdədir? Maşallah olsun, komandam möhkəmdir. Oyunumuzla da enişdə olmadığımızı göstəririk. Dörd gün əvvəl "Zirə"ni məğlub edərək ölkə kubokunda yarımfinala vəsiqə qazanan komanda enişdə ola bilməz. Sadəcə zədəlilərimiz çoxdur. Ona görə heyət baxımından sıxıntı çəkirik. Amma komandam möhkəmdir. Düşünürəm ki, öz iddiasından əl çəkməyəcək.

- Ülvi İsgəndərov start heyətində meydana çıxdı və qolunu da vurdu. Onu qarşıdakı matçlarda da start heyətində görmək mümkün olacaq?

- Ülvi bizim ehtiyat oyunçumuz deyil. Hər futbolçunun mövsüm ərzində şans qazanması özündən asılıdır. Ülvinin bu oyunda şansı oldu, istifadə etdi. Amma yenə də bütün futbolçularıma güvənirəm. İnanıram ki, meydana çıxanlar ən yaxşısını etməyə çalışacaqlar.

- İki dəfə hesabda geri düşsəniz də, bərabərlik qolunu vurdunuz. Qələbə qolu üçün nə çatmadı?

- Enişdə olan komanda iki dəfə oyunu çevirə bilməz. Komandam möhkəmdir, xarakteri var. Zədəlilər də qayıtdıqdan sonra daha da iddialı və hücumda daha yaxşı olacağıq.