Rəşad Sadıqov: “Vacib 3 xal qazandıq”

“Futbolçularıma təşəkkür edirəm. "Turan Tovuz" çox yaxşı komandadır, onlara qarşı oynamaq çətindir. Ağır oyun oldu. Olduqca vacib 3 xal qazandıq. Sıx qrafikdən keçirik. Bəlkə də ən çətin qrafik bizdədir. 4 gün sonra "Səbail"lə oyunumuz var. Tez bir zamanda həmin matça hazırlaşmalıyıq”.

Futbolxeber.az saytının məlumatına görə, bu sözləri “Zirə”nin baş məşqçisi Rəşad Sadıqov Azərbaycan Premyer Liqasının XXV turunda “Turan Tovuz”u 2:0 hesabı ilə məğlub etdikləri oyundan sonra deyib.

Daha sonra o, jurnalistlərin suallarını cavablandırıb:

- 3-cü dueldə Kurban Berdiyevi məğlub edə bildiniz. Qələbənin açarı nə idi?

- Futbolçuların əzmkarlığı və oyun intizamı əsas məqam idi. Burada oynamaq çox çətindir. Rəqib son 15 dəqiqədə önə atıldı. Onların uzun ötürmələrində səhvsiz oynadıq. Çempionatda heç kim bu sistemlə oynamır. Bir komandaya qarşı xüsusi hazırlaşmaq asan deyil. Futbolçularım əllərindən gələni etdilər.

- İssa Cibrilla şans qazandığı oyunlarda etimadı doğruldur. Onunla bağlı fikirləriniz necədir?

- Məqsəd İsayev və İssa bizim əsas oyunçularımızdandır. Rəqibə və limitə uyğun rotasiyalar edirik. Başqa rəqib olsaydı, bu gün onların ikisi də eyni anda meydanda olmayacaqdı. Məndə 11 əsas futbolçu deyə bir şey yoxdur. Bütün futbolçulara bu şəkildə yanaşmağa çalışırıq. Belə məqamlarda faydasını görürük.

- Tiaqo Silvanın əsas heyətdə yerini itirməsinin səbəbi nədir?

- Heç bir problem yoxdur. Dəfələrlə demişəm, yenə deyirəm. Aydın yaxşı performans göstərir. Amma bizim 1 nömrəli qapıçımız Tiaqodur. Limitə görə onu oynada bilmirəm. Tiaqo özü də bu durumu başa düşür. O, komandanın liderlərindən biridir.

- "Sabah" - "Araz-Naxçıvan" matçında hansı nəticənin qeydə alınmasını istəyirsiniz?

- Mənim nəsə deməyim düzgün olmaz. Həmişə qələbəyə köklənirik. Xeyirlisi nədirsə, o da olsun. Hər ikisi ölkə futbolunun aparıcı komanlarındandır. Maraqla oyuna baxacam.

- Salifu Sumaya həqiqətən də "Fənərbaxça"dan təklif gəlib? Sizə elə gəlmir ki, futbolçunun meneceri belə xəbərlərin çıxmasında maraqlıdır?

- Bizə "Fənərbaxça"dan rəsmi təklif gəlməyib. Mən də səhifələri izləyirəm. Salifu barədə xəbərlər çoxdur. Amma bunların əksəriyyəti həqiqəti əks etdirmir. "Dinamo"dan (Kiyev) təklif almışdıq. Yaxın zamanda transfer gözlənilmir. Ən yaxşı halda yayda ola bilər. Onun agenti ilə Bakıda görüşmüşəm. O da Salifunun bizdəki çıxışından məmnundur. Hamısı işin içində olan məqamlardır. Vacib olan odur ki, futbolçu bu situasiyada özünü yaxşı idarə etsin, oyunlara yaxşı köklənsin.