Bobur Abduxalikov: “Söz verirəm, “Kəpəz”lə oyunda qol vuracağam”

"Sumqayıt"ın hücumçusu Bobur Abduxalikovun Futbolxeber.az saytına müsahibəsi

- "Qarabağ"la oyunda 0:2 hesabı ilə uduzdunuz. Məğlubiyyəti nə ilə əlaqələndirmək olar?

- Matça yaxşı hazırlaşmışdıq. "Qarabağ"a qarşı oyun çox çətin alındı. Rəqibin gücü hər kəsə məlumdur. Bununla belə, əlimizdən gələni edirdik ki, rəqibdən xal alaq. Azarkeşlərimiz önündə oynayırdıq. Təəssüf ki, istəyimiz alınmadı. Artıq bu matçı unutmalı, qarşıdakı görüşlərə köklənməliyik. İnanıram ki, vəziyyəti dəyişəcəyik.

- “Sumqayıt”ın qol həsrəti bu matçda da davam etdi. Səbəbi nədə görürsünüz?

- Futbolda belə hallar olur. Məncə, bizə bir qol, bir oyun lazımdır ki, qalib gələk. Məhz həmin qələbədən sonra vəziyyət daha yaxşı olacaq. Qarşıdakı tura hazırlaşacağıq. İnanıram ki, qarşıdakı matçda qol vurub, qalib gələcəyik. Belədə hər şey daha yaxşı olacaq. Biz onsuz da daim ən yaxşısına çalışırıq.

- “Sumqayıt”a yeni qoşulmusunuz. Artıq komandaya tam adaptasiya ola bilmisiniz?

- Bəli, adaptasiya prosesim də yaxşı keçdi. Artıq 3 oyunda iştirak etmişəm. Komandada atmosfer də yaxşıdır. Bilirik ki, hazırda çətin durumdayıq. Çünki qələbə qazana bilmirik. Amma bunun üçün əlimzidən gələni edirik. İstənilən halda, qarşıdakı matçda bunu reallaşdıracağımıza inanıram.

- Növbəti matçda “Kəpəz”lə üz-üzə gələcəksiniz. Gəncə klubu həm də Premyer Liqada qalmaq uğrunda mübarizədə rəqiblərinizdəndir. Həmin matçda qələbə həsrətinə son qoymaq mümkün olacaq?

- Bizim üçün çox vacib oyundur. Həm biz, həm də "Kəpəz" üç xal üçün oynayacaq. Həftəboyu hazırlaşacağıq. Allah qoysa, qalib gələrik. Əsas odur ki, azarkeşlər də sona qədər inansınlar, dəstək olsunlar, stadiona gəlsinlər. Vacib məsələ budur. Biz də əlimizdən gələnin ən yaxşısını edəcəyik. Ümidvaram ki, hər şey yaxşı alınacaq və bu durumdan çıxacağıq.

- “Sumqayıt” azarkeşləri sizdən də qol gözləyirlər. “Kəpəz”lə matçda onları sevindirəcəyinizə söz verə bilərsiniz?

- Bəli, bəli söz verirəm. Ən yaxşısını etməyə çalışıram. Onsuz da, hər görüşə "Sumqayıt"a kömək etmək üçün çıxıram. Çalışacam ki, hər şey daha yaxşı alınsın.

Fərəc Aslanov