Ruslan Qurbanov: “Hakimin başına həyatda eyni şey gəlsin, o da, bu cür ədalətsizliklə üzləşsin”

“Allah şahiddir və o bilir kim haqlıdır, kim haqsız”.

Futbolxeber.az saytının məlumatına görə, bunu İdman.biz-ə “Hypers Guba”nın futbolçusu Ruslan Qurbanov deyib.

Azərbaycan millisinin sabiq hücumçusu AFFA-nın İntizam Komitəsinin ona verdiyi cəzaya münasibət bildirib: “Ən önəmlisi odur ki, mən hakimi söyməmişəm. Arzulayıram ki, hakimin başına həyatda eyni şey gəlsin, o da, bu cür ədalətsizliklə üzləşsin. Ona da elə eyni cür yanaşsınlar, necə ki, o, başqalarına belə edir”.

Qurbanov qərardan apelyasiya şikayəti verməyəcəyini də vurğulayıb: “Bunun bir mənası yoxdur, çünki onlar mənə inanmayacaqlar. Ancaq hakimlə bir masada oturmağa hazıram. Qoy yalan detektoru kimin haqlı, kimin haqsız olduğunu müəyyənləşdirsin. Mən başıuca yoluma davam edirəm. Çünki haqlıyam və belədə onlar isbat edə bilməyəcəklər ki, haqsızam”.

Qeyd edək ki, AFFA-nın İntizam Komitəsi II Liqanın XIV turunun “Hypers Guba” - “Şəmkir” oyununda ev sahiblərinin futbolçusu Ruslan Qurbanovu hakimi təhqir etdiyinə görə birbaşa qırmızı vərəqə aldığı üçün 4 oyun cəzalandırıb. Azərbaycan millisinin sabiq futbolçusu komandasını 300 manat ziyana salıb.