Musa Qurbanlı: “Məqsədimiz “qızıl dubl” etməkdir”

“Qarabağ”ın hücumçusu Musa Qurbanlının Futbolxeber.az saytına müsahibəsi

- Səfər “Sumqayıt” üzərində 2:0 hesablı qələbə qazandınız. Görüşü necə şərh edərdiniz?  

- Sumqayıtın ab-havası fərqlidir. Burada oynamaq heç vaxt asan olmur. Bu dəfə də maraqlı, bir o qədər də çətin matç alındı. Birinci hissədə daha aktiv idik. Fasilədən sonra sönük oynadıq. Lakin əsas odur ki, 3 xal qazandıq.

- Özünüz də qeyd etdiniz ki, fasilədən sonra sönük oynadınız. Bu, hesabdan irəli gələn arxayınçılıq idi?

- Tam arxayınçılıq deməzdim. Amma ola bilər ki, hesabın 2:0 olması öz təsirini göstərdi. Lakin bu, belə olmamalıdır. Bunun üzərində işləməliyik. Çünki belədə rəqibin şansları yaranır. “Sumqayıt” bir qol vursaydı, gərginlik yaranacaqdı. Yəni oyunun gedişatı tamamilə dəyişə bilərdi. Ona görə də çalışmaq lazımdır ki, sona qədər diqqətli oynayaq.

- Növbəti turda “Araz-Naxçıvan”la qarşılaşacaqsınız. Həmin matçdan gözləntiləriniz nədir?

- “Araz-Naxçıvan” çox yaxşı kollektivdir. Əsas rəqiblərimizdən biridir. Mövsümə çox yaxşı start vermişdilər. Düzdür, son turlar bir qədər xal itkiləri ilə üzləşdilər. Lakin bu o demək deyil ki, işimiz asan olacaq. Onsuz da Naxçıvan klubu ilə oyunlarımız hər zaman gərgin keçir. Qarşıdakı matçda da əlimizdən gələni edəcəyik ki, qalib gələk.

- Demək olar ki, turdan tura ən yaxın izləyicilərlə aranızdakı xal fərqi artır. Bu məqam oyunlara köklənməyinizə mane olmur?

- Xeyr. Mövsümün sonuna hələ 13 tur var. Üstəlik, çempionluğu təmin etməmişik. Ona görə də arxayınlaşa bilmərik. Turnir cədvəlinə çox da fikir vermirik. Çalışırıq ki, hər matçda qələbə qazanaq. Çempionluğu yalnız medalı boyunumuzdan asanda təmin edəcəyik.

- Kubokda da yarımfinala yüksəlmisiniz. Çempionatla müqayisə aparsaq, hansı yarış “Qarabağ” üçün prioritetdir?

- Məqsədimiz “Qızıl dubl” etməkdir. Hər iki cəbhədə qalib olmaq istəyirik.

Fərəc Aslanov