Kurban Berdiyev: "Bundan əvvəlki oyunlarda da bizim əleyhimizə qərarlar olmuşdu"

"Birinci hissədə taktiki planda bəzi səhvlərimiz oldu. Çətin, amma vacib qələbə idi. Futbolçularımı təbrik edirəm".

Futbolxeber.az saytının məlumatına görə, bu sözləri “Turan Tovuz”un baş məşqçisi Kurban Berdıyev Azərbaycan Premyer Liqasının 23-cü turunda “Araz-Naxçıvan”ı 1:0 hesabı ilə məğlub etdikləri oyundan sonra deyib.

O, Roderik Miller və Şəhriyar Əliyevin yoxluğunun komandanın nəticələrinə təsir etmədiyini bildirib: “Belə deməzdim. Denis Marandiçinini də əlavə etmək lazımdır. Amma hər zaman belə olur ki, komandaya yeni gələnlərin adaptasiya olması müəyyən vaxt alır. Oyunda müəyyən dəyişikliklər olur. Sistemi tətbiq etmək üçün vaxt lazım gəlir”.

Berdıyev Kristian Da Silvanın start heyətində olmamasını limitlə əlaqələndirib: “O, yaxşı vəziyyətdədir, amma limit amili var”.

“Sol cinahda Rüfət Əhmədovun yox, İsmayıl Zülfüqarlının oynamasının səbəbi nədir?” sualını “Turan Tovuz”un çalışdırıcısı belə cavablandırıb: “Planlaşdırmışdıq ki, Rüfəti ikinci hissədə meydana buraxaq. İlk yarıda İsmayıldan aktivlik gözləyirdik. Amma o istədiyimiz aktivliyi göstərə bilmədi”.

O, “Araz-Naxçıvan”ın müdafiəçisi İqor Ribeyroya verilən qırmızı vərəqəni belə şərh edib: “Bildiyiniz kimi, hakimliklə bağlı sualları cavablandırmaq istəmirəm. Belə yanaşsaq, bundan əvvəlki oyunlarda da bizim əleyhimizə qərarlar olmuşdu”.