Elmar Baxşıyev: “Bizi bu şəkildə sıxışdırmaq istəyirlərsə, alınmayacaq”

“Ağır oyun alındı. Hər iki komanda yaxşı mübarizə apardı. Komanda düşündüklərimizi meydanda verməyə, yaxşı iş göstərməyə çalışırdı. Yola davam etmək lazımdır”.

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Elmar Baxşıyev Azərbaycan Premyer Liqasının XXIII turunda “Turan Tovuz”a 0:1 hesabı ilə uduzduqları oyundan sonra deyib.

Mütəxəssis komandasının üzvü İqor Ribeyronun qırmızı vərəqə aldığı epizodu belə şərh edib: “Sizcə, var idi? Mən də təkrara baxdım. Orada heç sarı vərəqəlik bir şey yox idi. İki tur öncə demişdim ki, bizi bu şəkildə sıxışdırmaq istəyirlərsə, alınmayacaq. Komanda möhkəmdir, meydanda layiqli cavab verəcək. "Kəpəz"lə matçın 3-cü dəqəsində VAR-a baxmadılar. Amma sonradan görürük ki, penaltilik epizod idi. Davam etmək lazımdır”.

E.Baxşıyev oyundan sonra Naxçıvan Futbol Federasiyasının prezidenti Zaur Axundovla oyundan sonra söhbət etməsi barədə sualı belə cavablandırıb: “Ev oyunlarından sonra da Zaur müəllimlə görüşümüz olur. Öz dəstəyini bizdən əsirgəmir, komandanın yanındadır”.

"Araz-Naxçıvan"ın baş məşqçisi qeyd edib ki, heç bir komandanın haqqının yeyilməsini istəmir: “Futbol ədalət tələb edir. Futbolda varlı, kasıb anlaşıyı olmamalıdır. Bəlkə də onların fərqli gördükləri, düşündükləri var. Sınmaq olmaz, istədiyimizə çatmaq üçün yolumuza davam etmək lazımdır”.