Hakimlər “Sabah”ı “dartır” - QEYD

Dünəndən istər Türkiyədə, istər Azərbaycanda sosial şəbəkələrdə futbol azarkeşlərinin əsas müzakirə mövzusu “Qalatasaray” - “Adana Demirspor” oyununda yaşananlardır. Məlum məsələdir ki, ölkəmizdə “sarı-qırmızılılar”ın, eləcə də əzəli rəqib “Fənərbaxça”nın kifayət qədər azarkeşi var və Adana klubunun penaltiyə etiraz əlaməti olaraq meydanı yarımçıq tərk etməsi böyük rezonans doğurub. İndi hər kəs hadisələrin sonrakı gedişatını səbirsizliklə gözləyir...

Atalar misalında deyilir ki, “gülmə qonşuna, gələr başına”. İndi türkiyəli hakimlərin qərarına çox da lağ etməyək. Çünki azərbaycanlı hakimlər də türkiyəli həmkarlarının yanında heç də “toya getməli” deyillər. Çox uzağa getməyək. Elə dünən Masazırda yaşananlar da hakimlik adına rəzalət idi. Düzdür, bəzi “professor”lar oyuna gözləri ilə deyil, başqa yerləri ilə baxdıqları üçün “hakimlik nə var ki?” deyə bilərlər. Amma kor-kor, gör-gör. Dünən “Turan Tovuz” İnqilab Məmmədovun qurbanı oldu. Matçdan dərhal sonra Tovuz klubu video yayımlayaraq hakimlərin biabırçı idarəçiliyini fakt kimi ortaya qoyub. Bu, gözlənilən idi. Çünki matçı media tribunasından izləyərkən də İnqilab Məmmədovun “Sabah”ı “dartması” açıq-aşkar görünürdü.

Hər şey bir qırağa, ikicə nümunə deyək. “Turan Tovuz”un qapısına penalti təyin olunduğu epizodda hər şey İnqilab Məmmədovun yanlış fitindən sonra başladı. Amin Seydiyev ikili mübarizədən sonra yerdə qalarkən gücünü ayağına, başına yox, səsinə verdi. Referi də onun hayqırtısına aldanaraq olmayan cərimə zərbəsini təyin etdi...

O ki qaldı “Sabah”ın ikinci qoluna, həmin epizodda vəziyyətdə daha aşkar idi. Rəhim Sadıqova qarşı kobudluq edilsə də, referinin fiti “niyəsə” susdu və hücumun yekununda top “Turan Tovuz”un qapısından keçdi. Rəhimə qarşı kobudluğu nə İnqilab Məmmədov “gördü”, nə də VAR. Amma biz bura bir kadr əlavə edirik. Özünüz baxın, qiymət verin...

Azərbaycanlı hakimlər ədalət qoruyucusu olduqlarını bəzən unutsalar da, həyatda olduğu kimi, futbolda da ədalət var. Dünən meydan sahibləri sona yaxın üçüncü dəfə “Turan Tovuz”un qapısına yol tapsalar da, bu dəfə İnqilab Məmmədova siqnal gəldi və VAR-a baxdıqdan sonra referi Ayxan Quseynova qarşı kobudluq olduğu üçün bu qolu ləğv etdi. Bu, Tanrının biabırçı hakimliyə tərs şilləsi idi...

Əslində, biz vəziyyətin bu cür hal alacağını daha əvvəldən proqnozlaşdırmışdıq. Niyəsi çox sadədir. Bu gün AFFA İcraiyyə Komitəsində oturanlar faktiki “Sabah”ın rəhbərləridir və Azərbaycan futbolunu da, AFFA-nı da onlar idarə edirlər. Sərxan Hacıyev çoxdan Balakişi Qasımov-Maqsud Adıgözəlov tandeminin kölgəsində itib. Hakimlər kimə tabedir? AFFA-ya. AFFA-nı kim idarə edir? “Sabah” rəhbərliyi. Daha hakimlər “Sabah”ı qoyub, “Kəpəz”i, “Turan Tovuz”u dartmayacaqlar ki...

Bu gün “Sabah” rəhbərliyinə nəticə lazımdır. Nə yolla olur-olsun, bu komanda mütləq yayda avrokuboklara getməlidir. Əks halda ortaya çox biabırçı mənzərə çıxacaq. Sıravi azarkeşindən obyektiv jurnalistinə kimi sual verəcək ki, “hörmətli “Sabah” rəhbərliyi, siz bu büdcə ilə avrokuboklara yollana, 10 klub arasında dördlüyə düşə bilmirsinizsə, AFFA-nı, Azərbaycan futbolunu, millisini necə ağ günə çıxaracaqsınız?”

Odur ki, dünən Masazırda yaşananlar jurnal idi. Kino hələ qabaqdadır. Növbəti seriyanın anonsunu verək? Bu tragikomediyanın ardı Sumqayıtda yaşanacaq...

Futbolxeber.az