“Neftçi”nin yeni transferi: “Bütün komanda vuruşmasa, nəticə əldə etmək mümkün deyil”

“Neftçi”nin yeni transferi Elvin Camalovun Futbolxeber.az saytına müsahibəsi

- “Neftçi” 2025-ci ildə ilk qələbəsini qazandı. “Şamaxı”nı 1:0 hesabı ilə məğlub etdiyiniz görüşü necə şərh edirdiniz?

- Əvvəldən sona kimi döyüşdük, vuruşduq. Yekunda da qalib gəldik. Daha çox istəkli olduğumuzdan 3 xal qazandıq. Sona kimi mübarizə apardıq.

- Demək olar ki, kubok oyunu öncəsi bu qələbə yerinə düşdü?

- Çoxdandır qalib gələ bilmirdik. Turnir cədvəlində vəziyyətimiz ürəkaçan deyil. Ona görə də ardıcıl qələbələrə ehtiyacımız var. Bəli, bu qalibiyyət kubok matçı üçün motivasiyadır. Lakin kubokda “Kəpəz”lə səfər matçı da çox çətin keçəcək. Hazırda bütün rəqiblərə qarşı mübarizə aparmaq çətindir. Kim daha çox mübarizə aparsa, o da istəyinə çatacaq. Biz də əlimizdən gələni edəcəyik ki, səfərdən sərfəli nəticə ilə qayıdaq.

- Kubokdakı rəqibiniz “Kəpəz” çempionatda son iki matçında “Turan Tovuz” və “Sabah” kimi iddialı kollektivləri məğlub edib. Bu məqam sizi nə dərəcədə narahat edir?

- Bu dəqiqə bütün komandalar əzmkar və istəklidirlər. Biz də çalışacağıq ki, yarımfinala vəsiqə qazanaq. “Neftçi” kimi azarkeşi olan komanda ən yüksək pillələrdə olmalıdır. Daha üstün futbol oynamalıyıq. Yavaş-yavaş bunlar hamısı düzələcək.

- Artıq “Neftçi”nin üzvüsünüz. Komandanın cari mövsümdəki problemini nədə görürsünüz? Çatışmayan nədir?

- Mən komandada yeniyəm. Bəlkə də bu baxımdan nəsə deməyim düz çıxmaz. Yalnız öz adımdan deyə bilərəm ki, çalışmışam hər zaman komandaya vuruşqanlığı, əzmkarlığı aşılayım. Bütün komanda vuruşmasa, nəticə əldə etmək mümkün deyil. Ona görə də bir olmaq lazımdır. “Neftçi”də yaxşı futbolçular var. Sadəcə bir olub əzmkarlıq nümayiş etdirmək lazımdır.

- Bir qədər əvvələ qayıdaq. Kapitan ola-ola “Sabah”dan ayrılmağınız gözlənilməz oldu. Nə baş verdi? Bu qərarınızda legioner limitinin ləğv olunacağı barədə yayılan xəbərin hər hansı bir təsiri oldumu?

- Limitlə bağlı deməzdim. Sadəcə yeni baş məşqçinin gəlişindən sonra gördüm ki, mənə çox şans vermir. Bir matçda oynayıb, digərində meydana çıxmamaq normal haldır. Lakin bir məşqçi ümumilikdə səni əsas heyət üzvü kimi görmürsə, sən də milli komandanın üzvüsənsə, ya orda qalıb müqavilən bitənə kimi gününü ehtiyatda keçirməlisən, ya da getməlisən. Mən ikincini seçdim. Düşündüm ki, ehtiyatda qalmaqdansa, digər komandada özümü sınasam, daha yaxşı olar.

- Milli komandamızın üzvü kimi legioner limiti ilə bağlı fikirləriniz necədir? Sizcə, bu qərar azərbaycanlı futbolçuların, millimizin ziyanına olmayacaq?

- Mənim bu barədə nəsə deməyim düz çıxmaz. Yalnız onu söyləyim ki, bizim yerli futbolçular hər zaman legionerlərlə rəqabət aparıblar. Bundan sonra da elə olacaq. Hansı qərar qəbul edilməsindən asılı olmayaraq. Yenə də üzərimizə düşəni edəcəyik, rəqabətimizi aparacağıq.

- Məlum məsələdir ki, limitin ləğvi “Sabah”ın ideyasıdır, “Qarabağ”ın çempionluğuna son qoymaq üçün. Sabiq “Sabah”lı kimi fikriniz maraqlıdır: həqiqətənmi legioner limiti ləğv olunsa, “Qarabağ” çempionluğu itirəcək?

- Bu barədə nəsə deməyim düz çıxmaz. Lakin mən “Sabah”da oynayanda, elə hazırkı limitlə “Qarabağ”a qalib gəldiyimiz vaxtlar da olub. Murad Musayevin vaxtında “Qarabağ”la başabaş mübarizə aparmışıq. Rəhbər şəxslər nə qərar versələr, biz də yerli futbolçular olaraq öz rəqabətimizi aparacağıq.

İbrahim Cəfərov