Filip Ozobiç: “Heç-heçəni ədalətli nəticə saymaq olmaz”

“Neftçi”nin yarımmüdafiəçisi Filip Ozobiçin Futbolxeber.az saytına müsahibəsi

- “Neftçi” üçüncü dövrəyə heç-heçə (1:1) ilə başladı. “Sabah”la görüşü necə şərh edərdiniz?

- Yaxşı oyun keçirdiyimizi düşünürəm. Birdən çox qol vurmaq üçün şanslarımız da var idi. Lakin yaxaladığımız epizodları dəyərləndirə bilmədik. Buna görə də yekunda heç-heçə ilə kifayətlənməli olduq. Artıq növbəti görüşləri düşünməliyik.

- Heç-heçəni ədalətli nəticə saymaq olar?

- Tam da yox. Çünki rəqiblə müqayisədə bizim qol vurmaq üçün daha çox şansımız var idi.

- Qış fasiləsindən sonra komandada vəziyyət necədir?

- İndi fiziki baxımdan daha yaxşı vəziyyətdəyik. Bu da meydanda göründü. Lakin hər oyunda daha artığını etməliyik.

- Bəs qələbə üçün nə çatışmır?

- Sonluq. Son nöqtəni qoymaqda bir qədər çətinlik çəkirik. Halbuki yaxaladığımız şansları daha yaxş dəyərləndirsək, vəziyyət də fərqli olar. İnanıram ki, tezliklə vəziyyət müsbətə doğru dəyişəcək.

- Növbəti turda “Araz-Naxçıvan”la qarşılaşacaqsınız. Həmin matçdan gözləntiləriniz?

- Çətin oyun olacaq. “Araz-Naxçıvan” güclü təsir bağışlayır. Hər nə qədər çətin olsa da, hədəfimiz qələbə qazanmaqdır.  

- Bu matçı avrokuboklar baxımından “Neftçi” üçün həlledici saymaq olar? Çünki bu matçda qələbə qazanmasanız, yuxarı pillələrlə aradakı xal fərqi bir qədər də artacaq...

- Hazırda turnir cədvəlində vəziyyətimiz ürəkaçan deyil. Yuxarı pillələrdən xeyli aralı düşmüşük. Ona görə də hər matçda qələbə qazanmalıyıq. “Araz-Naxçıvan”la matç da istisna deyil.