Matias: “FCSB üçün Bakıda “Qarabağ”la heç-heçə etmək belə çətin olacaq”

“Qarabağ” normal səviyyədə oynasa, FCSB üçün heç-heçə etmək belə çətin olacaq”.

Futbolxeber.az-ın məlumatına görə, bunu "Neftçi"nin futbolçusu Yuri Matias Azərbaycan və Rumıniya təmsilçiləri arasında Bakıda keçiriləcək UEFA Avropa Liqasının Liqa mərhələsinin matçı ilə bağlı "Prosport.ro" saytına müsahibəsində deyib.

29 yaşlı müdafiəçi görüşün qonaqlar üçün çətin keçəcəyini bildirib: "FCSB də Avropada yaxşı oyun sərgiləyir. Amma bilməlidirlər ki, burada onları asan qarşılaşma gözləmir. "Qarabağ" son 10 ildə Avropada adından söz etdirib. Ölkənin ən tarixi, böyük klubu "Neftçi"dir, lakin son dönəmlərdə rəqibimiz dominantlıq edir. Bir çox oyunçuları 5-6 ildir ki, birlikdədirlər. Baş məşqçiləri 17 ildir ki, işinin başındadır. Meydana kimin çıxmasından asılı olmayaraq, bütün futbolçular nə etməli olduqlarını bilirlər".

Y.Matias Ağdam təmsilçisinin bir neçə oyunçusunu xüsusi fərqləndirib: "Azərbaycanda çıxış edən ən yaxşı futbolçu Olavio Juninyo idi. O da "Qarabağ"dan getdi. Amma burada yaxşı oyunçular çoxdur. Abdullah Zubir, Julio Romao və Marko Yankoviç kollektivdə mühüm rol oynayırlar".

Qeyd edək ki, UEFA Avropa Liqasının Liqa mərhələsinin VII turunun "Qarabağ" - FCSB matçı yanvarın 23-də, saat 21:45-də Tofiq Bəhramov adına Respublika stadionunda keçiriləcək. Turnir cədvəlində Azərbaycan çempionu 3 xalla 33-cü, FCSB 11 xalla 10-cu sıradadır.