Ruan Renato: “Erkən qol köməyimizə çatdı”

“Fasilədən sonra ilk oyunumuz idi. “Araz-Naxçıvan” fiziki cəhətdən çox güclü kollektivdir. Fasilədən qayıtmağımıza rəğmən, yenə də bu baxımdan seçildilər. Ümumilikdə bərabər səviyyədə keçən görüş oldu. Erkən qol köməyimizə çatdı. Nə qədər çətin olsa da, hesabı sonadək qorumağı bacardıq”.

Futbolxeber.az saytına müsahibəsində bu sözləri “Zirə”nin müdafiəçisi Ruan Renato Azərbaycan Premyer Liqasının XIX turunda “Araz-Naxçıvan”ı 1:0 hesabı ilə məğlub etdikləri oyun barədə danışarkən deyib.

O, bu oyunun əhəmiyyətini yaxşı anladıqlarını bildirib: “Bu matçadək də “Araz-Naxçıvan” turnir cədvəlində bizdən kifayət qədər irəlidə idi. Odur ki, qalib gəlməklə həmin xal fərqini bir az azaltmaq istəyirdik. Bunun öhdəsindən gəldik. Ancaq unutmaq olmaz ki, növbəti matçlarda xal itirəcəyimiz halda, həmin xal fərqi yenidən böyüyə bilər. Mən və komanda yoldaşlarım məsuliyyəti dərk edirik”.

Braziliyalı futbolçu matçın ilk hissəsində meydanda yaşanan gərginlikdən də söz açıb: “Müəyyən oyunlarda müəyyən futbolçular tərəfindən təxribatlar olur. Bir futbolçu kimi mən bu cür halların tərəfdarı deyiləm. Düşünürəm ki, hər bir idmançı bu cür situasiyada rəqibinə, həmkarına hörmətlə yanaşmalıdır. Məşqçimiz fasilədə bizə xüsusi tapşırıq verdi ki, təxribatlara əhəmiyyət verməməli, sırf nəticəyəyə köklənməliyik. Hətta məşqçidən sonra biz futbolçular öz aramızda danışdıq ki, heç bir təxribata getməyəcəyik, öz soyuqqanlılığımızı qoruyacağıq. Bu vəzifənin gəldik. İkinci hissədə sırf nəticəyə köklənmiş futbol göstərdik”.

R.Renato növbəti turda “Şamaxı”ya qarşı keçirəcəkləri görüşün çətin keçəcəyini bildirib: “Şamaxı” artıq müəyyən mənada yaxşı futbolçulardan təşkil olunmuş komandadır. Bunu artıq göstəriblər. Biz qış fasiləsində də “Şamaxı” ilə yoxlama matçına çıxmışdıq. Bir-birimizin zəif və güclü tərəflərini bilirik. Amma bir şeyi unutmayaq ki, növbəti “Şamaxı” matçı ən az “Araz-Naxçıvan”la oyun qədər çox önəmli olacaq. Məncə, hər kəs bunun əhəmiyyətini anlayır. Fərqi yoxdur, “Qarabağ”a, “Neftçi”yə qarşı oynayırıq, bütün oyunlara eyni konsentrasiya ilə köklənməliyik”.