Berdıyev: “11 legioner oynayacaqsa, onda bizim akademiyalar nə işə yarayır?”

“Ümumi götürsək, nəticədən məmnunuq. Əgər mövsümün əvvəlində kimsə desəydi ki, ilk yarını 3-cü pillədə yekunlaşdıracağıq, bu qədər xal toplayacağıq, bu fikirdən razı qalardıq və məmnun olardıq. Ancaq bəzi oyunlar oldu ki, daha yaxşı oynayıb qələbə qazana bilərdik”.

Futbolxeber.az saytının məlumatına görə, bu sözləri “Turan Tovuz”un baş məşqçisi Kurban Berdıyev klubun mətbuat xidmətinə müsahibəsində deyib.

O, hazırda Antalyada davam edən təlim-məşq toplanışını belə dəyərləndirib: “Yaxşı şəraitdə hazırlıq keçirik. Hava durumu da əlverişlidir. Təlim-məşq toplanışını plana uyğun və kifayət qədər yaxşı keçir”.

Berdıyev Tovuz klubuna qoşulan yeni tranfserlərdən də söz açıb: “Bu uşaqlar bizə birmənalı şəkildə kömək edəcəklər. Həm Rəhim Sadıxov, həm Orxan Əliyev kollektivə tez uyğunlaşa bilən futbolçulardır. Bu da olduqca vacib bir məqamdır. Onlar qarşıya qoyulan tapşırığı başa düşürlər və yaxşı hazırlaşırlar”.  

“Turan Tovuz”un baş məşqçisi son günlərin əsas müzakirə mövzusu olan legioner limitinin ləğvi barədə yayılan xəbərlərə də münasibət bildirib. O bildirib ki, bu məsələdə ani qərar vermək olmaz: “Mən bu məqamla tez-tez rastlaşmışam. Əgər limitlə bağlı danışırıqsa, onu demək lazımdır ki, bunun üçün strateji yönləndirmə lazımdır. Azərbaycan futbolunun yaxın 5-7 il ərzində inkişaf mərhələsi. Dəqiq bilmirəm plan hansı istiqamətdədir. Sözsüz ki, bu məsələdə vacib olan məqam təsadüfi yox, mərhələli şəkildə işin aparılmasıdır. Ani şəkildə məsələni qaldırıb qərar vermək olmaz. Əgər bu plan futbolun mərhələli şəkildə inkişafı üçün nəzərdə tutulubsa, bu başqa məsələdir. Əgər bu məsələ təsadüfi şəkildə yaranıbsa, onda nəsə demək çətindir".

Berdıyev limitin ləğvinin Azərbaycan klublarının akademiyalarına və gənc futbolçulara təsir edəcəyini qeyd edib: “Tutaq ki, ancaq 11 legioner oynayacaqsa, onda bizim akademiyalar nə işə yarayır. Onda bizim uşaqlar, indi oynayan azərbaycanlı futbolçular harada çıxış edəcəklər? Bu məsələni müzakirə edərkən ilk növbədə Azərbaycan milli komandasının strateji xəttini, ölkənin nüfuzunu əsas götürmək lazımdır. Yenə də təkrarlayıram, belə məsələni qaldıran insanlar bu barədə düşünürlərmi? Çünki uşaq və yeniyetmə milli komandalarının strateji inkişafı nəzərə alınmırsa, onda ölkə futbolunun nüfuzu olmayacaq. Məncə, biz anlamalıyıq ki, bu qərar sadəcə olaraq uşaq və yeniyetmə futbolunu öldürəcək. Sözsüz ki, bir çox azərbaycanlı bundan sonra harasa getmək məcburiyyətində qalacaq. Bilmirəm, çətin sualdır. Amma mən birmənalı olaraq buna qarşıyam".