Mehdi Cənnətov: “Milliyə dəvət almamağım mənim üçün sürpriz oldu”

“Sumqayıt”ın qapıçısı Mehdi Cənnətovun Futbolxeber.az saytına müsahibəsi

- Azərbaycan Premyer Liqasının son turunda səfərdə “Araz-Naxçıvan”a 0:1 hesabı ilə uduzdunuz. Məğlubiyyəti necə şərh edərdiniz?

- Oyunu pis keçirmədik. Qol vurmaq üçün şanslarımız var idi. Lakin onları dəyərləndirə bilmədik. Sonluq çatışmadı. Ümumi götürdükdə yaxşı oyun idi. Əsasən təkbətək mübarizələr gedirdi. Sonda konsentrasiyanı itirdik və qapımızda qol gördük.

- Nəticəni ədalətli saymaq olar?

- Deyərdim ki, daha çox heç-heçəlik oyun idi. Hər şey də buna doğru gedirdi. Təəssüf ki, matçın sonuna yaxın rəqib qələbə qolunu vurmağa müvəffəq oldu.

- Ardıcıl iki qələbədən sonra məğlubiyyətə səbəb nə oldu?

- Oyuna ciddi hazırlaşmışdıq. Qələbəni hədəfləyirdik. Amma görünən odur ki, “Araz-Naxçıvan” son turlar yüksəlişdədir. Ardıcıl qələbələrdən sonra komandada motivasiya çox yüksəkdir.

- Vaqif Cavadovun gəlişi “Sumqayıt”da nəyi dəyişib?

- Baş məşqçi dəyişikliyindən sonra tələblər də dəyişib. Biz də çalışırıq ki, yeni baş məşqçinin istəklərini meydanda yetirən yetirək. Oyunumuzda dəyişiklik var və bu, kənardan da hiss olunur.

- Komandaya yeni baş məşqçinin gəldiyini nəzərə alsaq, demək olar ki, çempionatdakı hazırkı fasilə “Sumqayıt”ın xeyrinədir?

- Əlbəttə. İnanıram ki, fasilə bizə faydalı olacaq. Məşq üçün kifayət qədər vaxtımız var. Növbəti matçlar üçün komandamız daha yaxşı, daha hazır vəziyyətdə olacaq.

- Millinin heyəti açıqlanarkən adınızın siyahıda yer almaması sizin üçün də sürpriz oldu?

- Açığı, millidən dəvət gözləyirdim. Demək olar ki, bəli, bu, mənim üçün sürpriz oldu. Amma çox təəssüflənmədim. Çünki baş məşqçi qərarının səbəbini açıqlayıb.

- Səbəb açıqlayarkən Fernandu Santuş son oyunlarınızı bəyənmədiyini bildirib. Halbuki heyət açıqlanan zaman, “Araz-Naxçıvan”la oyuna qədər siz son iki çempionat matçında qapınızı toxunulmaz saxlamışdınız...

- Baş məşqçi həm də inamsız çıxışımı qeyd edib. Deməli, ilk növbədə nələrsə barədə düşünməliyəm. Öz oyunumu daha da yaxşılaşdırmalıyam. Növbəti matçlarda milliyə layiq olduğumu sübuta yetirməliyəm. Üzərimə düşəni daha yaxşı etməliyəm.

- Sözlərinizdən belə çıxır ki, Santuşun fikirləri ilə razısınız? Çünki 4 oyunda start heyətində yer alan qapıçının növbəti dəfə yığmaya dəvət alan 3 qolkiper sırasına düşməməsi fikrimizcə, anlaşına deyil...

- Biz baş məşqçinin qərarı ilə razılaşmaya bilmərik. Onun seçimini qəbul etməliyik. Sadəcə meydanda nəyə qadir olduğumuzu sübut etməliyik.

- Elə “Araz-Naxçıvan”la son matçdakı qurtarışlarla nəyə qadir olduğunuzu göstərdiniz.

- Bu, bir oyundan asılı deyil. Stabil olduğunu bir neçə matçda göstərməlisən. Bir görüşdə yaxşı çıxış edib, növbəti 3 matçda zəif təsir bağışlamaq da qapıçı üçün müsbət məqam deyil.

İbrahim Cəfərov