Yankoviç: “Motivasiyamız yüksəkdir”

"Qarabağ"ın yarımmüdafiəçisi Marko Yankoviç UEFA Avropa Liqasının üçüncü turunda "Ayaks"a qarşı keçiriləcək matçdan öncə təşkil olunan mətbuat konfransında iştirak edib.

Futbolxeber.az saytının məlumatına görə, monteneqrolu futbolçu əvvəlcə görüşlə bağlı fikirlərini açıqlayıb: “Sabah bizi böyük futbol günü gözləyir. Böyük və tanınmış kluba qarşı oynayırıq. Motivasiyamız yüksəkdir. Sabah hədəfimiz yaxşı nəticə əldə etməkdir”.

O, keçmişdə də böyük klublara qarşı oynadıqlarını bildirib: “Futbolun gözəlliyi ondadır ki, hər şey baş verə bilir. Autsayder uda da bilər, favorit uduza da bilər. Keçmişdə göstərdiyimiz oyunlar onu göstərir ki, hər bir rəqibə qarşı oynaya bilərik. Sabah uda da bilərik, uduza da. Əsas odur ki, çıxıb özümüzü göstərək, nəticədən asılı olmayaraq, yaxşı oynayaq. Ümid edirəm ki, sabah nəticə də yaxşı olacaq”.

“Avropa Liqasının yeni formatı sənin üçün nə dərəcədə maraqlı gəlir?” sualını Yankoviç belə cavablandırıb: “Futbolçu kimi dəyişikliyi çox istəyirəm. Fərq ondadır ki, oyun sayı artıb. Bəlkə şans olacaq ki, böyük komandalara qarşı daha çox oynayaq. Hansısa böyük dəyişiklik hiss etmirəm”.