Günün sualı: “Neftçi”nin yeni baş məşqçisi kim olacaq? - TƏHLİL

Dünən Roman Qriqorçukla yollarını ayıran “Neftçi”nin yeni baş məşqçisinin kim olacağı barədə müzakirələr gündəmi zəbt edib. İstər sosial şəbəkələrdə, istər mətbuatda müxtəlif adlar səsləndirilir. Bəs görəsən, “ağ-qaralar”ın yeni baş məşqçisi kim olacaq?

İlkin ehtimal odur ki, yeni baş məşqçi yerli mütəxəssis olacaq. Ard-arda əcnəbi məşqçilərə etimad göstərən “Neftçi” rəhbərliyi deyəsən, bu dəfə yerli mütəxəssisə güvənmək fikrindədir.

Dünəndən etibarən yazılanları ümumiləşdirsək, belə görünür ki, “Neftçi”nin baş məşqçi postuna namizədlər bunlardır: Samir Abasov, Tərlan Əhmədov, Arif Əsədov, Aftandil Hacıyev, Mahmud Qurbanov və Adil Şükürov. Bəs bu altılıqdan hansının şansı daha realdır?

Samir Abasov “Neftçi”ni son dəfə çempion edib. Onu yenidən “ağ-qaralar”ın baş məşqçi postunda görmək istəyənlərin sayı kifayət qədərdir. Lakin Abasovun hazırda “Sumqayıt”la müqaviləsi var. Onun yenidən Sumqayıt-Bakı marşrutu üzrə hərəkət edəcəyi inandırıcı deyil. Üstəlik, deyilənlərə inansaq, Abasov yayda “Neftçi”dən təklif alsa da, qəbul etməyib.

Tərlan Əhmədovu da yenidən “Neftçi”də görmək istəyənlər çoxdur. Lakin nədənsə son zamanlar Əhmədovun adı demək olar ki, baş məşqçi postu boşalan bütün klublarla yanaşı hallansa da, “Araz-Naxçıvan” xaric heç biri ilə danışıqlar aparılmayıb. Bu səbəbdən də ən azı indiki məqamda Əhmədovun “Neftçi”yə qayıdışı real deyil.

Aftandil Hacıyev “Səbail” xaric hansısa klubda nəticə verməyib. Üstəlik, hazırda “Qarabağ”ın akademiyasına rəhbərlik edir. Odur ki, onun da təyinatı inandırıcı deyil. Fikrimizcə, adı yuxarıda çəkilən altılıqdan bu 3 məşqçi ilə yanaşı, digər 3-nün “Neftçi”nin yeni baş məşqçisi olmaq ehtimalı daha yüksəkdir.

Arif Əsədov demək olar ki, hazırda işsizdir. Əsədov da daha əvvəl “Neftçi”də çalışıb və çempionluq qazanıb. Unutmaq olmaz ki, Avropada tarix yazan “Neftçi”nin əsasını məhz Arif Əsədov qoymuşdu. Odur ki, təcrübəli mütəxəssisin “Neftçi”nin yeni baş məşqçisi olacağı kifayət qədər real görünür. Üstəlik, nəzərə almaq lazımdır ki, Əsədov son illər millidə çalışıb, “Neftçi”nin yerli futbolçuları Əsədovun, mütəxəssis də oyunçuların bacarığına yaxından bələddir.

Mahmud Qurbanov da daha əvvəl “Neftçi”də çalışıb. Düzdür, əsas deyil, əvəzedicilərdə. Amma “Professor”un buradakı işi uğurlu alınıb və o, “dubl”la çempionluq sevinci yaşayıb. Odur ki, Qurbanovun da yenidən “Neftçi”də iş başında olmaq ehtimalı az deyil.

Adil Şükürovun adı digərləri ilə müqayisədə daha az çəkilir. Lakin bizim ehtimalımıza görə, Şükürovun təyinatı kifayət qədər realdır. Adil Şükürovun lehinə olan 2 məqam var. Birincisi, Şükürov aşağı yaş qruplarını saymasaq, 2 dəfə baş məşqçi kimi Premyer Liqada çalışıb və hər iki halda nəticə verib. Mütəxəssis əvvəlcə “Zirə”yə gümüş medal qazandırıb. Daha sonra isə ötən il formalaşdırdığı əla kollektivlə belə demək mümkünsə, “bir ayaqla” “Kəpəz”i Premyer Liqada saxlayıb. Üstəlik, Şükürov azsaylı mütəxəssislərdəndir ki, “Neftçi”nin əzəli rəqibi “Qarabağ”a qarşı belə demək mümkündürsə, sözünü deməkdən çətinmir. Hər halda ötən mövsüm “Kəpəz”in “Qarabağ”a uduzduğu oyundan sonra Şükürovun “Qarabağ”ı qoruyurlar. Bu rəqibə qarşı sərt, aqressiv və dinamik oyun görmürük. Futbolçular cəza almaqdan və ya futbolçunu zədələməkdən çox çəkinir. Komandam meydanda bütün gücünü qoymalı, heç kimdən çəkinməməlidi” sözləri heç də birmənalı qarşılanmamışdı.   

Təbii ki, bütün bu yazdıqlarımı ehtimaldır. Vəziyyət hər an dəyişə bilər. Ona görə də necə deyərlər, yaşayarıq görərik. Əsas odur ki, yeni gələcək baş məşqçi “Neftçi”ni düşdüyü uğursuz durumdan çıxarsın...

Futbolxeber.az