Elmar Baxşıyevdan qələbə şərhi

“Bilirdik ki, bizi ağır oyun gözləyir. Tovuz səfərindən sonra bəzi futbolçuların bərpa prosesi ağır keçdi. Ümidverici odur ki, komanda müsbət siqnallar verir. Oyun ərzində məşqdə verdiyimiz tapşırıqları bizə qaytarırlar. Bu gün qalib gəldik, lakin daha artığını etməliyik”.

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Elmar Baxşıyev Azərbaycan Premyer Liqasının VIII turunda “Səbail”i 3:2 hesabı ilə məğlub etdikləri oyundan sonra deyib.

Mütəxəssis “Araz-Naxçıvan”ın doğma məkana qayıtması barədə məsələyə münasibət bildirib: “Hər mətbuat konfrasında mənə bu sualı verirlər. Amma bu, mənə aid olmayan sualdır. Naxçıvan rəhbərliyindən xahiş edirəm ki, komandanı Naxçıvana qaytarsınlar. Komanda doğma məkanda daha rəngarəng olacaq. Yaxşı futbolçular sahibik. Naxçıvanda oynayıb, azarkeşləri sevindirəcəyik”.

O, komandasının turnir cədvəlində liderliyə yüksəlməsinə münasibət bildirərkən bu barədə düşünmədiklərini vurğulayıb: “Turnir cədvəlin priqzmasından yanaşmırıq. Hazırlığı elə qururuq ki, hər dəfə növbəti oyunu düşünürük. Komandanı yığanda bu futbolçulara bələd idim. Yaxşı seleksiya işi aparmışıq. Amma yenə də tam istədiyim deyil. Daha rəngarəng ola bilərik”.

“Çempionatın startından öncə Zaur Axundov sizə 2 ay vaxt verdiyiniz demişdi. 2 aydan sonra lidersiniz. Növbəti hədəf nə olacaq?” sualını E.Baxşıyev belə cavablandırıb: “Zaur müəllimlə hər gün görüşürük. Həmin sözləri qıcıq yaratmamışdı. Çünki fikrini ifadə etmişdi, biz də normal qarşılaşmışdıq. Mövsüm uzundur. Daha da güclənməliyik. Çünki ehtiyat heyətimiz qısadır. Geniş olsa, daha yaxşı olardı”.