“Neftçi”nin sabiq kapitanı: “Məşqçi belə qərar verib, düz oldu, səhv oldu, fərq eləmir”

“Düzdür, “Qarabağ”la oyunda nəticə qazana bilmədik. Amma komanda meydanda qaçdı, nəticə qazanmaq istədi. Nəticə olmasa da, bu gün qaçmaq, istək daha önəmlidir. Nəticə olmayanda hər şey pis görünür. Düzgün getməyən şeylər var. İnanıram ki, düzələr”.

Futbolxeber.az saytına müsahibəsində bu sözləri “Neftçi”nin yarımmüdafiəçisi Rəhman Hacıyev deyib.

Buna qədər komandada ikinci kapitan olan 31 yaşlı yarımmüdafiəçi sarğını itirməsinə belə reaksiya verib: “Bu gün artıq mən kapitan deyiləm. Baş məşqçinin qərarına əsasən Şeydayev birinci, Matias ikinci, Bauer isə üçüncü kapitandır. Bu o anlama gəlmir ki, kapitanlıqdan çıxmışıq, komandadan uzaqlaşırıq. Xeyr. Mən bu fikrə hörmətlə yanaşıram. Məşqçi belə qərar verib, düz oldu, səhv oldu, fərq eləmir. Peşəkar futbolçu kimi bu qərara hörmətlə yanaşıram. Hər zaman komanda yoldaşlarıma dəstək olacam. Nə qədər “Neftçi”dəyəmsə, meydanda canımı qoyacam”.

R.Hacıyev “Səncə, baş məşqçi Roman Qriqorçuk niyə belə qərar qəbul etdi?” sualına cavabında deyib: “Baş məşqçinin fikrini bilmirəm. Bu, onun qərarıdır. Pis reaksiya verə bilmərəm. Xoş olmasa da, dediyim kimi, peşəkar futbolçuyam və bu qərara hörmətlə yanaşıram”.

Fərəc Aslanov