“Fikrimiz Çempionlar Liqasında idi”

“Bizim üçün çox vacib oyun oldu. Bu gün qarşımızda yaxşı müdafiə olunan, vuruşan kollektiv var idi. Kurban Berdıyev müdafiəni qurmaqda çox tanınmış mütəxəssislərdən biridir. Həmçinin əks-hücumları yaxşı qurur. Bunu bilirdik. Amma nə qədər də olsa, "Turan Tovuz"u yaxından tanımırdıq”.

Futbolxeber.az saytının məlumatına görə, bu sözləri “Qarabağ”ın baş məşqçisi Qurban Qurbanov Azərbaycan Premyer Liqasının IV turunda “Turan Tovuz”a 0:1 hesabı ilə uduzduqları oyundan sonra deyib.

O, qələbə münasibəti ilə rəqibi təbrik edib: “İstər-istəməz bizim fikrimiz daha çox Çempionlar Liqasında (ÇL) idi. Buna baxmayaraq, rəqib qalib gəlibsə, borcluyuq təbrik etməyə. İstəkləri ilə, oyun nizam-intizamı ilə qalibiyyətə layiq idilər. Tovuzda həmişə futbola maraq olub. Bu gün də gördük ki, tribunada Tovuzdan gəlmiş nə qədər azarkeş var idi. Mövsümboyu qarşımızda yaxşı rəqib olacaq. Öz azarkeşlərimizə təşəkkür edirəm, sona qədər bizimlə oldular”.

Təcrübəli mütəxəssis ilk penaltidən öncə hakimə etiraz etməsinin hansı epizodla bağlı olduğunu açıqlayıb: “Ofsayd epizoduna. Sonra dedilər ki, çox cüzi ofsayd var idi. Mənim gördüyümə görə yox idi. Hakimə dedim ki, ofsayd varsa, oyunu hücum bitəndən sonra saxla”.

Qurbanov “Dinamo” ilə matçın bu oyuna təsiri oldu?” sualını belə cavablandırıb: “Ümumiyyətlə Avropada oynadığımız bütün matçların təsiri var. Fərqli heyət oynayır, bəzi rotasiyalar edirik. Mən bu müddətdə həmişə məşqlərdən gileylənmişəm. 3-4 gündən bir iki heyət oynayanda futbolçuların hamısı bir yerdə məşq edə bilmir. Məşqin dinamikası, keyfiyyəti pozulur. Amma neçə illərdir biz belə davam edirik. Əvvəlki iki oyunda hiss olunmadısa, bu gün hiss olundu. Belə sıx qrafikdə futbolçuların hamısının sağlam olması vacibdir. Bizə qarşı çox ciddi hazırlaşan rəqiblər olur. Bu da normaldır. Mövsümün əvvəlidir. Belə məğlubiyyətlərin mənə, komandaya faydası çox olur”.

O, yeni qapıçı Mateuş Koxalskinin çıxışına da qiymət verib: “Normal. Lazım olan epizodlarda düzgün qərar verdi. Gələcəkdə start heyətində meydana çıxması öz əlindədir. Daha yaxşı davam etsə, biz "yox" deməyəcəyik”.