“Turan Tovuz”un kapitanı: “Mükafat olsa da, olmasa da, ürəyimizi meydanda qoyacağıq”

“Azarkeşlərimiz önündə ilk oyunumuz idi. Onları sevindirmək istəyirdik. Üstəlik, keçən il “Sumqayıt”la son matçda pis məğlub olmuşduq”.

Futbolxeber.az saytına müsahibəsində bu sözləri “Turan Tovuz”un kapitanı Şəhriyar Əliyev Azərbaycan Premyer Liqasının ikinci turunda “Sumqayıt”a 1:0 hesabı ilə qalib gəldikləri oyun barədə danışarkən deyib. 

O bildirib ki, komanda mükafat üçün mübarizə aparmır: “Ehtiram müəllim (“Turan Tovuz”un İdarə Heyətinin sədri Ehtiram Quliyev nəzərdə tutulur - F.A.) oyundan sonra paltardəyişmə otağına gəlib bizi təbrik etdi. Məsələ mükafatda deyil. Onsuz da klub rəhbərliyi hər zaman əməyimizi lazımınca qiymətləndirir. Mükafat olsa da, olmasa da, ürəyimizi meydanda qoyacağıq”.

Tovuz klubunun kapitanı bu yay komandaya qoşulan futbolçulardan razılıq edib: “İstər qapıçımız, istər Kristian, istərsə də Tural komandaya tez uyğunlaşıblar. Qələbə üçün əllərindən gələni edirlər. Komandanın kapitanı kimi bu məqam məni çox sevindirir”.

Ş.Əliyev “Turan Tovuz”un hədəflərindən də danışıb: “Oyundan oyuna artırırıq. İnanıram ki, turlar keçdikcə daha yaxşı çıxış edəcəyik. Həm də yeni oyun tərzimizə uyğunlaşmağa çalışırıq. Bu da müsbət nəticə qazanmağımıza kömək olacaq”.

32 yaşlı futbolçu növbəti turdakı Qərb derbisində qalib gəlməyə çalışacaqlarını söyləyib: “Rəqibin fərqi yoxdur. Onsuz da Liqada zəif komanda yoxdur. Üstəlik, “Kəpəz”lə matç derbidir. Həmin görüşə çox ciddi hazırlaşacağıq. Ardıcıl ikinci matçda yaxşı nəticə qazanaraq azarkeşlərimizi sevindirmək istəyirik”.

Fərəc Aslanov