Dmitri Litvin: “Neftçi”yə qarşı xarakter nümayiş etdirdik”

“Səbail”in müdafiəçisi Dmitri Litvinin Futbolxeber.az saytına müsahibəsi

- “Neftçi” ilə görüşdən heç-heçə ilə ayrıldınız. 1:1 hesablı bərabərliyi necə şərh edərdiniz?

- Oyun barəbər səviyyədə keçdi. Matça yaxşı başlamışdıq. Lakin rəqib standart vəziyyətdən sonra hesabı açdı. Bizim qol şanslarımız daha çox idi. Fasilədən sonra daha yaxşı oynadıq. Xarakter nümayiş etdirdik. Hesabı bərabərləşdirdik. Ümumi götürdükdə ikinci hissədə pis oynamadığımızı düşünürəm.

- Bu cür oyunu Zirədə nümayiş etdirməyinizə nə mane olmuşdu?

- Zirədə mövsümün ilk oyunu idi. Bir qədər praktika çatışmırdı. Rəqib isə avrokuboklarda çıxış edir, onlar daha hazırlıq idilər. Həmin matçda da ikinci hissədə toparlandıq, rəqibdən geri qalmadıq.

- Maraqlıdır ki, “Səbail” ötən mövsüm də əksər matçlarda fasiləyə qədər zəif təsir bağışlasa da, ikinci hissədə geridönüş edirdi. Cari mövsüm də ilk 2 turda eyni hala şahidlik etdik. Sizcə, bu, nə ilə bağlıdır?

- Məncə, bu, ilk növbədə konsentrasiya ilə bağlıdır. “Neftçi” ilə matçda dediyim kimi, standart vəziyyətdən sonra qol buraxdıq. Mənə elə gəldi ki, bir qədər ofsayta oxşayırdı. Ümumi götürdükdə ani diqqətsizliyə yol verdik.

- Həmin qola siz də standart vəziyyətdən başla fərqlənməklə cavab verdiniz. Yeni klubunuzda qol hesabını açdınız. Təəssüratlarınız necədir?

- Təbii ki, qol vurduğum üçün sevinirəm. Hər bir futbolçu kimi, mən də komandamın uğurunda pay sahibi olmaq istəyirəm. Fərqləndiyim üçün şadam.

- Azərbaycan Premyer Liqası ilə bağlı ilkin təəssüratlarınız necədir?

- Maraqlı çempionatdır. Bütün komandaların heyətlərində fərdi bacarığı yüksək olan futbolçular var. Gərgin və maraqlı liqadır.

- Lakin bəzi legioner bura gəlməmişdən öncə hesab edirlər ki, Azərbaycan çempionatında “bir ayaqla” da oynamaq olar...

- Qətiyyən! Mən belə düşünmürəm. Liqada çoxlu legionerlər var, klubların maddi durumu yaxşıdır. Azərbaycan Premyer Liqası rəqabətədavamlı yarışdır. Bildiyim qədəri ilə hər mövsümdə də inkişaf edir.

- “Səbail”ə gələnə qədər Azərbaycan futbolu, çempionatı barədə hansı informasiyalara sahib idiniz?

- “Qarabağ” haqda məlumatım var idi. Təlim-məşq toplanışları zaman bu klubun “Şaxtyor”, Kiyev “Dinamo”su ilə sparrinq matçlarını izləmişdim. Eləcə də daha əvvəl Azərbaycanda oynamış ukraynalılardan müəyyən məlumatlar əldə etmişdim.   

- Bəs siz özünüz daha əvvəl “Qarabağ”a qarşı oynamısınız?

- “Qarabağ”a, yaxud digər Azərbaycan klubuna qarşı oynamamışam.

- “Səbail”ə qədər nə vaxtsa Azərbaycandan təklif almışdınız?

- Xeyr, “Səbail”ə qədər heç bir Azərbaycan klubu mənə təklif göndərməmişdi.

İbrahim Cəfərov