Rəşad Sadıqov: “Cavab matçında daha istəkli, daha güclü “Osiyek” gözləyirəm”

“Birinci hissədə daha çox taktiki savaşın şahidi olduq. Rəqib əsasən standart vəziyyətlər zamanı təhlükəli olurdu. Birinci hissədə fərqlənmək üçün bir neçə şansımız var idi. Sonra müdafiədən çıxarkən top itkisinə yol verdik, rəqib dərhal bundan istifadə etdi və hesabda önə keçdi”.

Futbolxeber.az saytının məlumatına görə, bu sözləri “Zirə”nin baş məşqçisi Rəşad Sadıqov UEFA Konfrans Liqasının üçüncü təsnifat mərhələsi çərçivəsində “Osiyek”ə qarşı keçirilən ilk oyun barədə danışarkən deyib.

O, 1:1 hesablı heç-heçəni belə şərh edib: “İkinci hissədə meydanda üstün tərəf biz idik. Çalışırdıq ki, nəticəni dəyişək, hesabı bərabərləşdirək. Müəyyən məqamlarda dəqiqlik çatmırdı. Rəqibin səviyyəsini, bacarığını nəzərə alsaq, bu, heç də asan deyildi. Bu gün 0:1 hesabı ilə məğlub olsaydıq belə, düşünürəm ki, hər şey ikinci matçda həll olunacaqdı. Cavab oyununda hər iki komanda sıfırdan başlamalıdır. Bir həftə sonra bizi çox maraqlı oyun gözləyir”.

R.Sadıqov bildirib ki, “Osiyek” istedadlı futbolçulardan yığılmış komandadır: “Çox yaxşı seleksiya işi aparılıb. Gənc, istedadlı, savadlı məşqçiləri var. Onun səviyyəsini bugünkü oyunda hiss edirdik. Nə gözləyirdiksə, onu da meydanda gördük. Futbolçularıma təşəkkür etmək istəyirəm. Bu rəqibə qarşı səfər oyununda qarşılıq verdilər. İndi bizi məsuliyyətli cavab oyunu gözləyir”.

“İkinci oyundan gözləntiləriniz nədir?” sualını “Zirə”nin baş məşqçisi belə cavablandırıb: “İndi daha çox çempionatda “Sabah”la oyunu düşünəcəyik. Bizi qarşıda derbi matçı gözləyir. Fikrimizi həmin matça yönəldəcəyik. Daha sonra isə “Osiyek”lə görüşə hazırlaşacağıq. Cavab matçında daha istəkli, daha güclü “Osiyek” gözləyirəm. Biz də rəqibə eyniliklə qarşılıq vermək istəyirik. Ona görə də düşünürəm ki, azarkeşlər üçün çox maraqlı oyun olacaq”.  

Sadıqov vurğulayıb ki, müasir futbolda hər bir rəqibə qarşı oynamaq mümkündür: “Azərbaycan futbol cameəsində belə fikir formalaşıb ki, maraqlı oyun gedirsə, hər hansı klubumuz yaxşı nəticə qazanırsa, deməli, bu rəqibə qarşı oynamaq olar. Ümumən müasir futbolda hər rəqibə qarşı oynamaq. Hər şey uğurlu alınsa, TOP ölkələrin favorit komandalarını çıxmaq şərti ilə istənilən rəqiblə matçda yaxşı nəticə əldə etmək olar. Bu gün üçün vacib olan odur ki, ikinci hissədə oyunu bərabərləşdirdik, futbolçular istəkli idilər ki, uduzmayaq. Düşünürəm ki, “Osiyek” çox yaxşı futbolçulardan formalaşmış komandadır. Bu cür rəqiblə başabaş, bəzən üstün oynayan futbolçularıma təşəkkür etmək istəyirəm”.