“Şamaxı” 2 legionerlə müqavilə imzalayır - AÇIQLAMA

Transfer çalışmalarını davam etdirən “Şamaxı” daha 2 legionerlə müqavilə imzalayır.

Futbolxeber.az saytına bu barədə komandanın baş məşqçisi Ayxan Abbasov məlumat verib.

O bildirib ki, müdafiəçi Lubeni Haukonqo və hücumçu Morqan Ferrierin keçidi reallaşmaq üzrədir: “Hər iki oyunçu ilə razılıq əldə olunub. Tezliklə ölkəmizə gələcəklər. Tibbi müayinədən uğurla keçdikdən sonra onlarla rəsmi müqavilə imzalanacaq”.

A.Abbasov əlavə edib ki, daha bir stopper axtarışı davam edir.

Qeyd edək ki, 23 yaşlı Lubeni Haukonqo Zamibiya millisinin üzvüdür. O, vətənində “Svakopmund” və “Eleven Arrovs”da forma geydikdən sonra 2019-cu ildə “Lill”in B komandasına cəlb olunub. Haukonqo daha sonra CAR-ın “Chippa United” və “Cape Taun Spurs” klublarında çıxış edib.

İngiltərəli Morqan Ferrierin isə 29 yaşı var. O, həm vinger, həm də mərkəz hücumçusu kimi çıxış edir. Vətənində aşağı liqa təmsilçiləri “Nottingem Forest”, “Ketterinq Taun”, “Krey Uonderers”, “Bishop's Stortford”, “Hemel Hempstead Taun”, “Boreham Vud”, “Dagenham & Redbridge”, “Boreham Vud”, “Uolsoll” və “Tranmere Rovers”də forma geydikdən sonra 2021-ci ildə İsrailin “Makkabi Petah Tikva” klubuna transfer olunub. Növbəti mövsümü “İroni Kiryat Şmona”da keçirən Morqan Ferrier 2022-2023 mövsümünün ilk yarısını Taylandın “Nakhon Ratşasima”, ikinci yarısını BƏƏ-nin “Al Urooba” klubunda forma geyib. İngilis forvardın son klubu “Hapoel Acre” olub.