FİFA-dan Azərbaycan millisinin futbolçusuna “yaşıl işıq” - EKSKLÜZİV

Milli komandamızın yarımmüdafiəçisi Coşqun Diniyevin Türkiyənin “Ümraniyespor” klubundan ayrılmasının detalları məlum olub.

Futbolxeber.az saytının əldə etdiyi məlumata görə, Türkiyə klubu həmyerlimizlə vidalaşmaq istəməyib. “Ümraniyespor” ötən mövsüm özünü yaxşı tərəfdən göstərən Diniyevi heyətində saxlamaq arzusunda olub. Lakin son 5 ayda maaş ala bilməməsi səbəbindən Coşqun klubdan getmək qərarına gəlib.

Həmyerlimizin menecerləri futbolçunun azad agent olması üçün əvvəlcə Türkiyə Futbol Federasiyasına, daha sonra isə FİFA-ya müraciət ediblər. Müraciətdə futbolçunun 5 ay maaş almaması göstərilib və sözləşməyə xitam verilməsi istənilib. Ali futbol qurumu sənədləri gözdən keçirdikdən sonra haqlı olaraq Coşqun Diniyevin xeyrinə qərar qəbul edib və futbolçuya azad agent statusu verilib.

Qeyd edək ki, artıq azad agent olan millimizin yarımmüdafiəçisi digər klublarla danışıqlar apara bilər.