Komanda sözünün haqqını verən komanda

Bir neçə ayın söhbətidir. Veteran futbolçulardan biri şikayətlənib ki, “jurnalistlər imkan vermirlər işləyək. Hər yanda onlardılar. Klublarda jurnalistlər işləyir, menecerliyi jurnalistlər edir, Peşəkar Futbol Liqasını jurnalistlər zəbt edib və s. və i.a.” Yox, bu ittihama cavab vermək fikrində deyiləm. Onsuz da bu cür fikirlərə ən yaxşı cavabı elə öz işləri ilə həmkarlarımız verirlər. Eynən Peşəkar Futbol Liqası (PFL) kimi...

İyunun 2-də PFL komandası böyük ölçüdə 2023/24 mövsümünə yekun vurdu. I və II Liqada qalmaq uğrunda pley-off matçlarını nəzərə almasaq, PFL cari mövsümdəki missiyasını da uğurla başa vurdu. Özü də bu dəfə PFL-in işi əvvəlki illərə baxanda daha ağır idi. İlk dəfə idi ki, Peşəkar Futbol Liqası Azərbaycanda 5 müxtəlif turnir keçirirdi – Premyer Liqa, Əvəzedicilər Liqası, I Liqa, II Liqa və ölkə kuboku. Məhdud kollektivlə 5 liqanın öhdəsindən gəlmək sizə asan gəlməsin. Özü də PFL komandası hər hansı məsələni “yola verməyib”, həqiqətən də ortaya iş qoyub.

Halbuki ötən ilin dekabrında baş verən dəhşətli qəzadan sonra PFL-in toparlanacağına bəziləri şübhə edirdi. Lakin əminliklə söyləmək olar ki, məlum faciə onları daha da güclü etdi. Qurumun prezidenti Elxan Səmədov və vitse-prezident Aslan Şahgəldiyev hazırda reabilitasiya dövrünü keçsələr də, xəstəxanada olduqları müddətdə 1 gün belə olsun işlərini axsatmadılar. Xəstəxanadan çıxdıqdan sonra Aslan bəy işə də çıxdı, Elxan bəy isə bütün ağrı-acıya baxmayaraq, daim kollektivə rəhbərlik etdi. Belə güclü qurum hansı işin öhdəsindən gələ bilməz ki...

Yuxarıda da qeyd etdiyim kimi, sayları elə də çox deyil. 35, maksimum 40 nəfərdilər. Amma bəzən 350-400 adamın işini görürlər. Kənardan hər şey asan görünə bilər. Lakin adamlar həqiqətən də çox əziyyət çəkirlər. Ən azı futbolun içində olanlar bütün bunları görür və bilir. Operatorlar bəzən elə olur ki, bir gündə 800-1000 km məsafə qət etməli olurlar. Sənan Abdullayev bəzən 5 nəfərin işini görür. Qurumun prezidenti vəzifəsini müvəqqəti icra edən Elgiz Abbasov stadionda olarkən ən xırda məsələdə belə jurnalistlərə kömək etməyə çalışır. Bir-bir hamısının adını çəksəm, yazı uzanar. Qısaca deyim ki, bizim gözümüzdə PFL kollektivinin hər bir üzvü mövsümün qəhrəmanı, öz işinin fədasidir...

P.S. Mövsüm boyu olduğu kimi, kubokun finalının təşkilatçılığı da əla idi. Lakin deallara varıb, uzun-uzadı vaxtınızı almaq fikrində deyiləm. Bu cızma-qara da mövsüm boyu əziyyətimizi çəkən PFL-ə təşəkkür borcumuzdur. Belə də davam edin, dostlar. Siz sübut etdiz ki, məhdud büdcə ilə də çox iş görmək olar. Yetər ki, istək və komanda olsun.

P.P.S. Mənim üçün finalın ən möhtəşəm kadrı məhz yuxarıdakı fotodur. Aslan Şahgəldiyevi yenidən stadionda görmək insana təsviri mümkünsüz olan bir sevinc yaşadır. İnşallah ən qısa zamanda Elxan Səmədovu da iş başında görək!