Bir fotonun qorxusu... - QEYD

Şənbə günü Azərbaycan Premyer Liqasının 34-cü turu çərçivəsində keçirilən “Araz-Naxçıvan” - “Turan Tovuz” matçında xüsusi qonaq var idi. Söhbət AFFA-nın keçmiş icraçı-vitse prezidenti, son illər FİFA-nın Avropa Milli Assosiasiyalar üzrə direktoru vəzifəsini tutan Elxan Məmmədovdan gedir. O, görüşü Azərbaycan Futzal Federasiyasının prezidenti Zaur Axundovla birgə izləyirdi. Bu məqam matçı canlı yayımlayan “CBC Sport”un kameralarının gözündən yayınmamışdı. 

Matçdan sonra həmin kadr ətrafında əməlli-başlı ajiotaj yaşandı. Belə görünür ki, Elxan Məmmədovun “CBC Sport” tərəfindən ekrana gətirilməsi bəzilərində əməlli-başlı qorxu yaradıb, kimlərsə onun kölgəsindən də qorxurlar. Belə olmasaydı, sabiq baş katibin ekrana gətirilməsi, adi çempionat matçını tribunadan izləməsi bu qədər səs-küy doğurmazdı. Elxan Məmmədovdan bu qədərmi qorxursunuz? Sualı oxuyub ağız büzəcəksinizsə, onda bu reaksiya, bu ajiotaj nəyə lazımdır axı? Elxan Məmmədov Bakıya gələ bilməz? Yoxsa çempionat oyununu stadiondan izləyə bilməz?..   

Şənbə günü Elxan Məmmədovun Mərdəkanda olduğu vaxt, onun keçmiş müavini, sonradan xələfinə çevrilmiş Sərxan Hacıyev də Zirədə idi. Görəsən, bu, təsadüf idi? Yoxsa sabiq rəhbərinin “Araz-Naxçıvan” - “Turan Tovuz” matçında olacağını bilən S.Hacıyev Zirədə görünməklə kiməsə nəyisə sübut etmək istədi? Yaxud o da “CBC Sport”un ekranlarında görünmək eşqinə düşmüşdü?..