Abu Dosso: “Son tura qədər yüksək pillələr uğrunda vuruşacağıq”

“Sumqayıt”ın müdafiəçisi Abu Dossonun Futbolxeber.az saytına müsahibəsi

- Azərbaycan Premyer Liqasının 30-cu turunda öz meydanınızda “Zirə” ilə bərabərə qaldınız. Qolsuz yekunlaşan görüşü necə şərh edərdiniz?

- Gərgin, mübarizə dolu bir matç keçdi. "Zirə" ilə oynamaq həmişə çətinlik yaradır. Oyun ərzində hər şey etdik ki, fərqlənək. Təəssüf ki, alınmadı.

- İlk hissə çox sönük keçdi. Qapıya ilk zərbə 38-ci dəqiqədə endirildi. Demək olar ki, komandalar daha çox uduzmamağı düşünürdülər?

- "Zirə" bu oyuna heç-heçə etmək üçün çıxmışdı. Onlar matç ərzində hücum etmirdilər. Biz isə cəhdlər göstərib qapıya zərbələr vururduq. Amma fərqlənmək qismət olmadı.

- “Sumqayıt” bu matçda 1 xal qazandı, yoxsa 2 xal itirdi?

- Düzünü desəm, 2 xal itirdik. Amma çempionat başa çatmayıb. Biz komanda olaraq mübarizəmizi davam etdiririk. Son tura qədər yüksək pillələr uğrunda vuruşacağıq.

- Sona 6 tur qalmış avrokuboklar şansını necə dəyərləndirirsiniz?

- Əlbəttə, bizim hələ də şanslarımız qalır. Dediyim kimi, son tura qədər avrokuboklara vəsiqə verən pillələr üçün döyüşəcəyik. Hər oyunda əsas cəhdlərimiz bu istiqamətdə olur.

- “Sumqayıt” rəhbərliyi, futbolçular azarkeşlərə çağırış etsələr də, stadionda yenə də anşlaq yaşanmadı. Növbəti ev oyunu “Qarabağ”ladır. Gözləmək olar ki, həmin matçda stadion tam dolacaq?

- Bu barədə mənim üçün nəsə demək çətindir. Azarkeşlərin həmin oyunda stadionu doldurmaqlarını istərdim. Amma bunun olub-olmayacağını bilmirəm. "Qarabağ"la istənilən meydanda oynamaq çətindir. Amma bundan öncə bizim "Turan Tovuz"la səfər matçımız var. Hazırda yalnız bu səfər oyununa köklənəcəyik.

- Həmin görüşdən gözləntiləriniz nədir?

- Tovuz səfəri həmişə çətin olur. İstər məsafə baxımından, istərsə də rəqib. “Turan Tovuz” yaxşı komandadır. Onlarla görüşlərimiz hər zaman çətin keçir. Budəfəki matç da istisna təşkil etməyəcək. Lakin uğur qazanmaq üçün əlimizdən gələni edəcəyik.

Azad NURİYEV