“Qarabağ” qızıl medalları bu tur təmin etsə, çempionluq kubokuna nə vaxt qovuşacaq?

“Qarabağ” sabah 2023/24 mövsümündə Azərbaycan Premyer Liqasında çempionluğunu rəsmiləşdirə bilər.

Futbolxeber.az saytının məlumatına görə, 28-ci tur çərçivəsində Ağdam klubu "Kəpəz"lə görüşdə 3 xal qazansa, sona 8 tur qalmış qızıl medalları təmin edəcək. Qurban Qurbanovun komandası “Kəpəz” üzərində qələbə qazanacağı halda xallarının sayını 69-a yüksəldəcək və tarixində 11-ci dəfə Azərbaycan çempionu olacaq.

Qeyd edək ki, 27 turdan sonra "Qarabağ"ın 66, ikinci və üçüncü yerlərdə qərarlaşan "Sabah"la "Neftçi"nin isə 40 xalı var.

Bəs sabah 11-ci dəfə qızıl medalları qazanacağı halda “Qarabağ”a çempionluq kuboku nə vaxt təqdim olunacaq: növbəti turda, yoxsa bunun üçün mövsümün sonunu gözləmək lazım gələcək?

Futbolxeber.az saytına açıqlamasında Peşəkar Futbol Liqasının (PFL) media və marketinq direktoru Sənan Abdullayev məsələyə aydınlıq gətirib. O bildirib ki, birinciliyi vaxtından əvvəl hansı turda təmin etməsindən asılı olmayaraq, Ağdam klubu çempionluq kubokuna sonuncu ev oyununda qovuşacaq:  “Qarabağ” Azərbaycan Premyer Liqasının 28-ci turunda - “Kəpəz”lə oyunda qızıl medalı təmin etsə belə, çempionluq kubokunu sonuncu ev oyununda alacaq. Bu da Premyer Liqanın 35-ci turuna təsadüf edəcək. “Qarabağ” “Turan Tovuz”la mayın 19-dakı matçdan sonra mükafatlandırılacaq”.