Ramil Şeydayev “Kocaelispor”da?

Azərbaycan milli komandasının hücumçusu Ramil Şeydayevlə bağlı iddia irəli sürülüb.

Futbolxeber.az saytının məlumatına görə, Türkiyə mətbuatı 26 yaşlı hücumçunun "Kocaelispor"a keçmək üzrə olduğunu yazıb. Bununla bağlı məlumatlar bu gün Kocaeli bölgəsinin bir neçə yerli media qurumunda yayılıb. Bildirilib ki, Şeydayev klubu "Buriram Yunayted"lə (Tailand) müqaviləni ləğv etdikdən sonra Türkiyəyə yollanacaq. Onun "Kocaelispor"la 1,5 ilik müqavilə imzalayacağı iddia edilib.

Hələlik klublar, futbolçu və onun agenti tərəfindən bu məsələyə münasibət bildirməyib. Amma "Kocaelispor"un bu gün ərzində bununla bağlı rəsmi açıqlama yayacağı vurğulanıb.

Məlumata görə, "Kocaelispor" klubu Şeydayevdən əvvəl "Neftçi"nin kapitanı Emin Mahmudovun da xidmətində maraqlı olub.

Xəbərdə qeyd olunub ki, Mahmudov özü bu keçidə müsbət yanaşsa da, "Neftçi" Türkiyə klubundan yüksək məbləğdə transfer haqqı istəyib. "Kocaelispor" isə bu transferdən imtina edərək diqqəti Ramil Şeydayevin transferinə yönəldib.

Qeyd edək ki, Ertoğrul Sağlamın baş məşqçisi olduğu  "Kocaelispor" 1-ci liqada yarışır və hazırda turnir cədvəlində 2-ci pillədədir. Komandanın hədəfi yeni mövsümdən Superliqada oynamaqdır.

Xatırladaq ki, R.Şeydayev "Qarabağ"dan ayrıldıqdan sonra 2023-cü ilin yayında "Buriram Yunayted"lə 2 illik müqavilə imzalayıb.