Millət vəkili: “Sumqayıt”ın cari mövsümdəki uğurlu çıxışı hamımızı ruhlandırır”

“Futbolda belə hallar olur. Nəticəni öncədən planlaşdırmaq mümkün deyil. Hər iki komanda gözəl oyun göstərdi. Tovuzluları da təbrik edirəm. Kifayət qədər iradə ortaya qoydular. O ki qaldı “Sumqayıt”a, kollektiv bu il yaxşı futbol nümayiş etdirir”.

Futbolxeber.az saytına müsahibəsində bu sözləri sumqayıtlı millət vəkili Müşfiq Məmmədli deyib.

Azərbaycan Premyer Liqasının XV turu çərçivəsində keçirilən “Turan Tovuz” - “Sumqayıt” matçını (2:2) Tovuz şəhər stadionundan canlı izləyən M.Məmmədli qonaqların cari mövsüm uğurlu çıxış etdiyini bildirib: “Çempionat oyunlarını mütəmadi olaraq izləyirəm. “Sumqayıt”ın cari mövsümdəki uğurlu çıxışı hamımızı ruhlandırır. İnanıram ki, komanda qarşıdakı turlarda da gözəl oyunu ilə bizləri sevindirəcək”.

Millət vəkili Mehdi Hüseynzadə adına Sumqayıt şəhər stadionunda yenidənqurmadan sonrakı ilk oyunun vaxtını da açıqlayıb: “Bilirsiz ki, Sumqayıtda yenilənmiş stadionumuz da artıq hazırdır. Məndə olan məlumata görə, “Qarabağ”la çempionat oyunu (8 dekabr, saat 19:30) məhz yeni stadionda keçiriləcək. Ölkəmizdə həm idman, həm də infrastruktur inkişaf edir”.

Müşfiq Məmmədli milli komandamızda yerli baş məşqçi görmək istədiyini vurğulayıb: “Düzdür, xarici mütəxəssislərin yenilikləri tətbiq etməsi baxımından onların ölkəmizdə çalışması önəmlidir. Amma ortada “Qarabağ” örnəyi var. Görsənir ki, yerli məşqçi ilə də böyük uğurlara imza atmaq mümkündür. Hazırkı tarixi məqamda, ruh yüksəkliyi yaşadığımız günlərdə milli komandada yerli məşqçi daha müsbət nəticə əldə edə bilər. Təbii ki, bunu futbol mütəxəssisləri daha yaxşı bilər. Bu, sadəcə azarkeş, vətəndaş kimi arzumdur”.

Sonda deputat Xankəndi stadionunda Azərbaycan Kubokunun matçının keçirilmə ehtimalına da toxunub: “Xankəndinin separatçılardan azad olunması ilə hər bir azərbaycanlı qürur duyur. Bu, Azərbaycanın tarixinə qızıl hərflərlə yazıldı. Ali Baş Komandanımız ölkəmizin ərazi bütövlüyünü təmin etməklə xalqımıza gözəl duyğular bəxş etdi. Dövlət başçımızın rəhbərliyi ilə ordumuz bizi böyük qələbələrə apardı. Xalqımızın qarşısında da baş əymək lazımdır ki, bütün çətinliklərə baxmayaraq, dözdü və öz torpağını azad etdi. Xankəndidə “Qarabağ”ın iştirakı ilə kubok oyununun keçirilməsi çox müsbət məqamdır. Xankəndidəki hər oyun tarixə qızıl hərflərlə düşəcək”.

Fərəc ASLANOV, Tovuz