Dejan Kuluşevski: “Azərbaycan millisi bizə qarşı ağıllı oynadı”

İsveç millisinin və “Tottenhem”in yarımmüdafiəçisi Dejan Kuluşevskinin Futbolxeber.az saytına müsahibəsi

- Azərbaycan millisindən alınan 0:3 hesablı məğlubiyyət barədə nə deyə bilərsiz?

- Rəqib bizdən üstün oynadı. Azərbaycan millisi meydanda daha yaxşı görünürdü. İlk dəqiqələrdən bu qələbəyə layiq olduqlarını vurduqları qollarla sübut etdilər. Erkən qollardan sonra heç cür özümüzə gələ bilmədik.

- Üçüncü qol barədə nə düşünürsüz? Azlıqda qalan rəqibdən o cür qol buraxmağınız nə dərəcə gözlənilməz idi?

- Səmimi desəm, qol inanılmaz idi. Zərbə möhtəşəm alındı. Futbol belə çılğın epizodlarla gözəldir.

- Öz meydanınızda 5 qolla üstələdiyiniz Azərbaycan millisinə Bakıda 3 cavabsız qolla uduzduz. İki matç arasında bu cür fərqin olması nədən irəli gəlir?

- Evdə Azərbaycan millisinə qarşı yaxşı oynayıb qalib gəlmişdik. Bu dəfə isə hadisələrin tam əksi oldu. Onlar qələbə üçün hər şeyi etdilər. Rəqib qollar vurmaq üçün riskə belə getməyə hazır idi. Biz heç cür Azərbaycan millisindən bir üst səviyyə çıxıb oyunu dəyişə bilmədik.

- Məğlubiyyətinizdə həlledici amil nə oldu?

- Erkən qolları qeyd etmək olar. Azərbaycan millisi oyuna əla başladı. Sanki hər şey bir anda baş verdi. Belə təəssürat yaranırdı ki, biz artıq matçın startında təslim olmuşduq. Oyun bizim üçün olduqca mürəkkəb keçdi. Azərbaycan millisi bizə qarşı ağıllı oynadı. Təzyiq yarada bildilər və istədikləri nəticəni qazandılar.

- 90 dəqiqə ərzində demək olar ki, real qol epizodu yarada bilmədiz...

- Razıyam. Hər bir faktorda axsadıq. Həm müdafiədə, həm də hücumda baxımlı oyun göstərə bilmədik. Şanslarımız olmadı.

Azad NURİYEV