Elmar Baxşıyev: "Heç bir komandaya belə hakimlik arzulamıram"

"Maraqlı oyun alındı. Hər iki komanda layiqli mübarizə apardı. Elə matç idi ki, hər iki komanda qalib gələ bilərdi. Şans "Zirə"nin tərəfində oldu".

Futbolxeber.az saytının məlumatına görə, bu sözləri "Qəbələ"nin baş məşqçisi Elmar Baxşıyev Azərbaycan Premyer Liqanın 13-cü turunda səfərdə "Zirə"yə 0:1 hesabı ilə uduzduqları oyundan sonra deyib.

O, komandasının məğlubiyyətinin səbəbini belə izah edib: "Qol çatmadı. Oyunu dəyişmək üçün qol vurmalısan. Çempionatın ən çox hücumda olub, ən az qol vuran komandasıyıq. Bu, özü bizə siqnal verir ki, çoxsaylı epizodlara giririk, amma reallaşdırmaqda çətinlik çəkirik. Sonuncu yerdəyik. Danışmaq yox, işləmək lazımdır ki, nəyisə dəyişə bilək. Komandamdan razıyam. Amma hakimlik bərbad idi, hər epizodda futbolu çirkinləşdirməyə çalışırdı".

Yenilgiyə baxmayaraq, o, matçın bərabər səviyyədə keçdiyini vurğulayıb: "Qol vurmaq, qələbə qazanmaq lazımdır. Neçə turdur qol vurmuruqsa, qalib gəlmək mümkün deyil. Analiz edirik ki, nəyə görə həmin epizodlar qolla nəticələnmir. Bu gün bərabər səviyyəli oyun getdi".

Baxşıyev sonuncu pillədən qurtulmalı olduqlarını qeyd edib: "Ötən mövsüm başqa komandamız var idi. Qarşımıza qoyulan hədəflərə çatdıq. İndi isə yeni komandamız var, sonuncuyuq. Daha çox çalışıb sonuncu pillədən qurtulmaq lazımdır".

"Qəbələ"nin çalışdırıcısı son 15 dəqiqədə komandasının aqressiv görünməsinə də toxunub: "Səbəbini indi deyəcəm sizə. İkili mübarizə gedir və birinci epizodda hakim oyunçumuza sarı vərəqə göstərir. Dördüncü hakim çağırır ki, "Zirə"nin oyunçusuna da sarı vərəqə göstər, baş hakim bunu etmir. Elçin Məsiyev bu gün göstərirdi ki, bir komandanı qoruyuram, digərini necə istəyirəm əzirəm. Futbolçular da sonda istəklərini göstərməyə başladı".

E.Baxşıyev hakimin qərarlarına qıcıqlandığını söyləyib: "Heç bir komandaya qarşı belə hakimlik arzulamaram. Hamı məni təmkinli adam kimi tanıyır. Ancaq Elçin Məsiyevin verdiyi qərarlar məni belə qıcıqlandırırdı".