"Zirə"nin kapitanı: "Çempionluq barədə düşünməyimiz belə düz deyil"

"Bilirdik ki, çətin oyun olacaq. Çünki ilk dövrədə səfərdə "Qəbələ"yə uduzmuşduq. Ona görə də bu matça çox ciddi hazırlaşmışdıq. Son zamanlar uğursuz çıxış etsə də, heyətlərində çox təhlükəli futbolçular var. Oyun çox ağır keçdi. Çətin də olsa, yekunda çox vacib qələbə qazandıq".

Futbolxeber.az saytına müsahibəsində bu sözləri "Zirə"nin kapitanı Qismət Alıyev Azərbaycan Premyer Liqasının XIII turunda "Qəbələ"ni 1:0 hesabı ilə məğlub etdikləri oyun barədə danışarkən deyib.

Matçın taleyini həll edən yeganə qolun müəllifi olan Q.Alıyev komandasının uğurunun hər şeydən önəmli olduğunu bildirib: "Mənim üçün əsas olan komandamın uğurudur. Vurduğum qollarla qələbədə pay sahibi olmağım çox xoşdur. Çalışacam ki, bundan sonra da komandama faydalı olum".

O, növbəti turda "Zirə"ni daha bir ağır oyun gözlədiyini vurğulayıb: "Qarşıda bizi "Sumqayıt"la çox çətin matç gözləyir. Həmin qarşılaşma da çox ağır keçəcək. Hazırda "Sumqayıt" əla formadadır. Buna baxmayaraq, əlimizdən gələni edəcəyik ki, xallarımızın sayını artıraq". 

13 turdan sonra lider olmalarına baxmayaraq, kapitan "Zirə"nin çempionluq barədə düşünmədiyini vurğulayıb: "Mövsümün əvvəlində qarşımıza çempionluq hədəfi qoyulmayıb. Heç indi də bu barədə düşünmürük və düşünməyimiz belə düz deyil. Təbii ki, komandanın hədəfi var. Məqdədimiz avrokuboklara vəsiqə qazanmaqdır. Məhz bunun üçün mübarizə aparırıq. Hazırda çempionatın ən qızğın dövrüdür. Hədəf daha çox xallarımızın sayını artırmaq barədə düşünürük".

27 yaşlı futbolçu komandasının müdafiə futbolu sərgiləməsi barədə fikirlərə belə münasibət bildirib: "Baş məşqçimizi hamı tanıyır. Rəşad Sadıqov heç vaxt bizdən müdafiə futbolu oynamağı tələb etməyib. Sadəcə bəzən oyunun gedişatı bizi müdafiə olunmağa məcbur edir. Bu gün hakim "Qəbələ" ilə matçın sonuna 9 dəqiqə əlavə etmişdi. 1:0 hesabə ilə öndə idik. Belədə məcburən müdafiə olunmalıyıq ki, qələbəni əldən verməyək. Biz heç vaxt meydana müdafiə olunmaq üçün çıxmırıq".

Fərəc ASLANOV