“Kəpəz”in kapitanı: “Rəqiblərə asan qollar vurmaq üçün imkan yaradırıq”

“Araz-Naxçıvan”a məğlubiyyətə görə konkret səbəb gətirə bilmərəm. Amma görünən odur ki, bəzi oyunlarda biz rəqibə asan qollar vurmaq üçün imkan yaradırıq. Demək olar ki, hər matçda fərdi səhvlərə yol veririk. “Araz-Naxçıvan”ın penalti qazandığı epizod da buna nümunədi”.

Futbolxeber.az saytına müsahibəsində bu sözləri “Kəpəz”in kapitanı Yeqor Xvalko Azərabaycan Premyer Liqasının V turunda “Araz-Naxçıvan”a 1:2 hesabı ilə uduzduqları oyun barədə danışarkən deyib.

Belaruslu müdafiəçi buraxılan səhvlərin oyuna köklənmə ilə bağlı olmadığını bildirib: “Məşqlərdə də, oyunlardan öncə də məşqçilər korpusu bizə tapşırıqlarını verir. Düşünmürəm ki, bu səhvlər konsentrasiya ilə bağlıdı. Əgər matçın əvvəlində rəqib qapımıza yol tapsaydı, bu fikirlə razılaşmaq olardı”.

“Kəpəz” “Neftçi”yə qalib gəlib, səfərdə “Qarabağ”dan xal alsa da, öz meydanında “Turan Tovuz” və “Araz-Naxçıvan”a uduzub. 26 yaşlı futbolçu qeyri-stabilliyin səbəbini belə izah edib: “Bəli, bu, paradoksdu. Məşqçilərimiz də bildirirlər ki, “Neftçi” və “Qarabağ”la matçlarda toplanan 4 xal bizi arxayınlaşdırmamalıdı. Hər matça ciddi yanaşmalıyıq”.

Xvalko azarkeşləri sevindirmək üçün əllərindən gələni etdiklərini bildirib: “Məşqlərdə, oyunlarda əlimizdən gələni edirik. Hər matça qələbə üçün çıxırıq. Elə oyunlar var ki, bizi 1 xal da razı sala bilər. Bir sözlə, azarkeşlərimizi hər matçda sevindirməyi arzulayırıq. Təəssüf ki, bəzən istəyimizə çata bilmirik. Lakin ruhdan düşmürük. Növbəti matçlarda əlimizdən gələni edəcəyik ki, azarkeşlərimiz məyus olmasınlar”.