Yuri Matias: "Neftçi"də liderlik etmək istəyirəm"

"Bu gün ilk qələbimizi qazandıq. Komandamızı təbrik edirəm. Bu oyunda qələbə qazanmaq üçün hərtərəfli hazırlaşmışdıq".

Futbolxeber.az saytına müsahibəsində bu sözləri "Neftçi"nin üzvü Yuri Matias Azərbaycan Premyer Liqasının IV turunda "Qəbələ"ni 2:0 hesabı ilə məğlib etdikləri oyundan sonra deyib. 

Braziliyalı müdafiəçi "Neftçi"nin ilk qələbəsini yalnız dördüncü qazanmasının səbəbini belə izah edib: "Komandada hər şey yenidir. Transferlər heyətə yalnız indi-indi uyğunlaşır. Oyundan oyuna daha yaxşı performans sərgiləyəcəyik". 

O, komandaya uyğunlaşması barədə bunları söyləyib: "Mənə komandaya uyğunlaşmağım üçün çox kömək edirlər. "Neftçi"də liderlik etmək istəyirəm. Daha da çox qol vurmaq niyyətim var. Azarkeşlərin mənə dəstəyini yüksək qiymətləndirirəm. Düşünürəm ki, liderliyi təbii olaraq edirəm. Şou üçün yox. İstəyirəm ki, komanda yoldaşlarıma da bu hissi aşılayım".

28 yaşlı futbolçu bu qələbədən sonra "Neftçi"nin uğurlu seriya yaxalamaq perspektivi barədə söyləyib: "Bunu demək çətindir. Qələbədən şadıq, amma bunu əldə etmək asan deyil. Ardını gətirəcəyimizi demək mənimçün çətindir. Milli komandaların fasiləsində daha yaxşı hazırlaşacağıq". 

Matias Azərbaycan çempionatı haqda məlumatlı olduğunu vurğulayıb: "Bütün klublar haqqında məlumatım var. Əksər oyunları izləyirəm, futbolçuları tanıyıram. Çempionatda çox güclü komandalar var. Birinci olmaq üçün əlimizdən gələni edəcəyik". 

O, "Neftçi"nin hədəfinin çempionluq olduğunu vurğulayıb: "Neftçi"də hər şey yüksək səviyyədədir. Buna əsasən biz birinci yerdə olmalıyıq. Addım-addım buna nail olacağıq. Məqsədimiz birinci yerdə olmaqdı".

Y.Matias komandasınl "Qarabağ"la mübarizəyə hazır sayır: "Qarabağ"ı yaxşı komanda olaraq tanıyıram. Onlarla başa-baş mübarizə aparacağıq. "Qarabağ"la görüşə də 3 xal üçün çıxacağıq". 

Braziliyalı futbolçu sonda azarkeşlərə çağırış edib: "Düzdü, Avrokubok matçları ilə çempionat oyunlarına gələn azarkeş sayı arasında böyük fərq var. Amma bu, başqa Avropa ölkələrində də belədir. Yaxşı oynasaq, azarkeşlər stadionu doldurmağa başlayacaq. Mən də onları komandaya dəstəl olmağa çağırıram".