Elvin Bədəlov: “Neftçi” ilə oyunda qələbəyə inanırıq” (MÜSAHİBƏ)

“Sumqayıt”ın müdafiəçisi Elvin Bədəlovun Futbolxeber.az saytına müsahibəsi

- Premyer Liqanın üçüncü turunun açılış matçında “Araz-Naxçıvan”la heç-heçə (1:1) oynadız. Mövsümdəki ilk xal itkisini nə ilə əlaqələndirmək olar?

- Çətin oyun alındı. “Araz-Nazçıvan” ilk turdan göstərib ki, yaxşı komanda formalaşdırıb. Biz də 3 xal qazanmaq istəyirdik. Oyuna yaxşı başladıq. Hər şey bizim nəzarətimizdə idi. Hesabı da açmışdıq. İstəyirdik ki, qələbə qazanaq. Bunun üçün sona kimi vuruşduq da. Lakin ikinci hissədə oyun əldən getdi. Rəqib bizə xeyli çətinlik yaratdı. Artıq bu oyunu unutmaq, gələcəyə baxmaq lazımdı.

- İkinci hissədə “Sumqayıt” müdafiədən çıxmağa çətinlik çəkirdi. Bunu nə ilə əlaqələndirmək olar?

- Birinci hissədə rahat idik. Lakin fasilədən sonra dediyiniz halla üzləşdik. Bu da normaldı. Bilmirəm bunu fiziki durumla əlaqələndirim, yaxud hazırlıqla. Tam formada deyilik. Bir qədər vaxt lazımdı. 2-3 turdan sonra tam hazır olacağımızı düşünürəm.

- Ardıcıl ikinci turdu komandanı meydana kapitan sarğısı ilə çıxardırsız...

- Təbii ki, kapitanlıq sarğısı məsuliyyətimi daha da artırır. Çalışıram komandamın uğur qazanması üçün əlimdən gələni edim.

- Növbəti turda “Neftçi” ilə qarşılaşacaqsınız. Bu görüşdə məğlubiyyətsizlik seriyasını davam etdirmək mümkün olacaq?

- Həmin oyunu səbirsizliklə gözləyirik. Çünki çempionatda ilk ev oyunumuz olacaq. “Neftçi” ciddi rəqibdi. Bununla belə, mövsümdəki ilk ev matçımızda qələbə qazanmaq istəyirik. Bunun üçün əlimizdən gələni edəcəyik. Rəqib hər nə qədər güclü olsa da, “Neftçi” üzərində qələbəyə inanırıq.

- Qeyd etdiyiniz kimi, bu, “Sumqayıt”ın ilk ev oyunu olacaq. Bu da “Sabah”la görüşün təxirə düşməsindən irəli gəlir. Həmin qərar “Sumqayıt”ın xeyrinə oldu, yoxsa..?

- Həmin görüş təxirə salınsa da, əvəzində yoxlama matçı keçirdik. Bu səbəbdən də komanda tonusdan düşmədi. Rəqib I Liqa təmsilçisi olsa da, yoxlama görüşü bizə faydalı oldu. Amma düşünürəm ki, indiki məqamda nə qədər tez-tez oyun keçirsək, daha yaxşıdı. Çünki bu halda daha tez ideal formaya düşəcəyik.