Rəşad Sadıqovdan qələbə şərhi: "Futbolçularım çox güc sərf etdilər"

"Çox gərgin və emosional oyun oldu. Kənardan baxıb daha dəqiq fikir bildirmək olar. Çox vacib qələbə qazandıq. Önəmli 3 xaldır. Futbolçularıma göstərdikləri əzmkarlığa görə təşəkkür edirəm".

Futbolxeber.az⁵ saytının məlumatına görə, bu sözləri "Zirə"nin baş məşqçisi Rəşad Sadıqov Azərbaycan Premyer Liqasının 4-ci turunda "Sabah"a qalib gəldikləri (1:0) görüşdən sonra təşkil olunan mətbuat konfransında deyib.

"Paltardəyişmə otağında "Qəbələ" ilə oyunu düşünməyə başladıq. Futbolçularım çox güc sərf etdilər. Bilirəm ki, çox yoruldular. Yaxşı bərpa olub növbəti oyunlara hazırlaşmaq lazımdır", - deyə o bildirib.

Təcrübəli mütəxəssisin sözlərinə görə, ötən mövsüm komandada ciddi problemlər var idi: "Heç cür onları həll edə bilmirdik. Mövsümün gedişatında ona zaman olmurdu. Fikirləşirdim ki, avrokuboklara vəsiqə qazanmamaq, bəlkə də, xeyrimizə olacaq. İşləyib yeni mövsümə hazırlaşmağa çoxlu vaxtımız var idi. Həftəiçi itkimiz oldu: İsmayılı itirdik. Müəyyən dəyişikliklərə getdik. “Sabah”ın aparıcı qüvvələrindən biri Letiçdir. Ona görə də sağ cinahda Məqsəddən istifadə etdik. Sol cinahda isə hər şey daha fərqli oldu. Oyundan öncə plan qurursan, amma o, alına da bilər, alınmaya da. Bu gün planımız uğurlu alındı. Bu, bizi sevindirir. Futbolçularıma intizamlı olduqları üçün təşəkkür edirəm. Meydanda qələbə qazanmaqdan ötrü hər şey etdilər".

R.Sadıqov deyib ki, oyunu müdafiədən qurmağı düşünmürdülər: "Erkən qol olduqdan sonra fikirləşdim ki, rəqib böyük qüvvə ilə irəli atılacaq. Rəqibimiz çox güclü komanda idi. Şanssızlıqdan Konfrans Liqasında çıxışlarını dayandırıblar, hətta qrupa belə yüksələ bilərdilər. Onları çox yaxşı tanıyırıq. “Sabah” qol vursaydı, hər şey fərqli olacaqdı. Əsas məqsədimiz pressinq tətbiq etmək idi. Bilirdik ki, rəqibin usta oyunçuları var. Onlara meydanda boşluq versək, qarşısıalınmaz olunacaq. Futbolçularımın çıxışından razıyam. Hər iki komandanın təhlükəli hücumları var idi. Hər şey yaşana bilərdi.

O, 14 futbolçunun klubdan ayrıldığını xatırladıb: " Gələnlərin sayı o qədər deyil. 5-6 futbolçu transfer etmişik. Mövsümə uğurlu başlamışıq. Daha da çox çalışmalıyıq. Rəqiblər də bizə qarşı fərqli yollar seçəcəklər. Futbolçularım eyforiyaya qapılmayıblar. Əksinə, istəklidirlər. Belə bir şey hiss etsəm, oyunçularla aramda ciddi problem olacaq. İstər qələbə, istər məğlubiyyət olsun, biz ən yaxşı formada oynamağa çalışmalıyıq. Bu təfəkkürlə komanda inkişaf edə bilər. Söhbət qələbədən getmir. Mental olaraq işimizə doğru yanaşsaq, heç bir problem olmayacaq. Aqressiv futbolçuları sevirəm. Həddi aşanda müdaxilə edirəm. Məqsəd İsayevin aqressivliyini oyunun içində hiss etmədim. Aşırı şəkildə varsa, mütləq müdaxilə etməliyik. Gələn oyunlarda bizə problem yaradar".