Roi Kehat: "Araz-Naxçıvan"ın hesabı bərabərləşdirməsi bütün planlarımızı pozdu"

"İlk hissəyə yaxşı başladıq. Nəzarəti öz əlimizdə saxlamağı bacardıq. İkinci hissəyə də bu cür başlasaq da, 3 xalı qoruya bilmədik. Rəqibin hesabı bərabərləşdirməsi bütün planlarımızı pozdu".

Futbolxeber.az saytına müsahibəsində bu sözləri "Sumqayıt"ın yarımmüdafiəçisi Roi Kehat Azərbaycan Premyer Liqasının IV turunda "Araz-Naxçıvan"la heç-heçə (1:1) etdikləri oyundan sonra deyib.

İsrailli futbolçu komandasınım bəzi çatışmayan cəhətləri olduğunu bildirib: "Düşünürəm ki, yaxşı komanda qurmuşuq. Amma bəzi çatışmayan cəhətlərimiz var. Bunlar üzərində işləməliyik. Bu gün də məhz həmin çatışmazlıqlar səbəbindən xal itirdik".

O, növbəti turda qarşılaşacaqları "Neftçi" ilə matçdan da söz açıb: "Neftçi" ilə matç ağır olacaq. Rəqibimiz çempionatın top klublarındandır. Biz də öz növbəmizdə yaxşı komandayıq və hazırda gözəl performans sərgiləyirik. Həmin matça yaxşı hazırlaşacağıq. Bacardıqca oyundan qələbə ilə ayrılmaq üçün döyüşəcəyik".

Bu yay "Sumqayıt"a qoşulan Kehat komandaya uyğunlaşdığını qeyd edib: "Komandanın məşqçilər heyətini və bu komandanın tərkibində çalışan bir çox işçini bəyənirəm. Onlar mənə çox kömək olur. Özümü bu klubda evimdəki kimi hiss edirəm. Sumqayıt çox yaxşı şəhərdir. Bakını da çox sevirəm".

"Sumqayıt"ın üzvü 4 turdan sonrakı çıxışlarını belə dəyərləndirib: "Hələ ki bir oyunumuz qalıb. "Sabah"a qarşı ehtiyatda bir matçımız var. Həmin görüşə də yaxşı hazırlaşacağıq. Komanda şəklində özümüzü əla hiss edirik. Hədəflərimizə çatmağa hələ uzun bir yol var. Hər oyun daha da yaxşısını edəcəyik".