Azər Bağırov: "Fasilədən sonra uşaqlar toparlandılar"

"İki fərqli hissə izlədik. Birinci hissədə daha çox müdafiə olunduq, boşluqlar verdik. Verdiyimiz tapşırıqları ilk yarıda orta xətdəki oyunçular yerinə yetirmirdi. Fasilədən sonra uşaqlar toparlandılar və necə lazımdı, necə tapşırılmışdısa, davam etdik. Çoxlu qol epizodlarımız oldu. Məncə, bu gün "Sumqayıt" bir xal qazandı".

Futbolxeber.az saytının məlumatına görə, bu sözləri "Araz-Naxçıvan"ın baş məşqçisi Azər Bağırov Azərbaycan Premyer Liqanın IV turunda "Sumqayıt"la heç-heçə (1:1) etdikləri oyundan sonra keçirilən mətbuat konfansında deyib.

Mütəxəssis komandasının ikinci hissədə daha çox uzun ötürmələrə üstünlük verməsinə belə aydınlıq gətirib: "Rəqibi meydana yayaraq tapşırılmış zonalara ötürmələr etməliydik. Orta xəttimiz çatdırmadığına, tapşırığı düzgün yerinə yetirmədiyinə görə dediklərimiz alınmırdı. İkinci yarıda cinahlardan, orta xətdən asmalarla rəqibi müdafiədə otuzdurduq. İkinci hissədə tam fərqli futbol sərgilədik. Hansı ki, onu birinci hissədə etməliydik".

A.Bağırov ilk hissənin çempionat başlayandan bu yana komandası üçün ən pis 45 dəqiqə oıması fikri ilə razılaşıb: "Bəli, dörd turdakı ən pis 45 dəqiqəmiz oldu. Bizim kimi yeni yığılan komandada bir futbolçunun meydanda səhv gedişatı olanda boşluqlar görünür. Çünki rəqiblərimiz daha hazırlıqlıdır. Çempionat üçün yığılan ən gec komandayıq və çatışmayan cəhətlərimiz daha çoxdur".

O, transfer çalışmalarının davam etdiyini bildirib: "Transferimiz olacaq. İşlərimiz gedir. Ümumiyyətlə, transferlərdə səhv etmək istəmirik. Çempionatın gedişatında səhvlərimiz ola bilər. Bu da tələskənliyimizdən irəli gəlir. Bu gün hamını komandaya uyğunlaşdırmağa çalışırıq. Amma transferi düşünürük. Hücumameyilli oyunçu gətirməyi planlaşdırırıq. Vinger və ya "10 nömrə" də ola bilər".

"Araz-Naxçıvan"ın çalışdırıcısı ilk turda kobud səhvlərlə yadda qalan qapıçı Semir Bukviçi yola salmaq fikrində olmadıqlarını qeyd edib: "Bir səhvinə görə qapıçı ilə sağollaşmaq istəməzdik. Bosniya və Herseqovina çempionatda çıxış edib, yetərincə normal qapıçıdır. Demirəm top qapıçılardandır. Amma normaldır. Doğrudur, "Turan Tovuz"la görüşdə səhvlərlə yadda qaldı, onun günü deyildi. Amma bu gün burdadırsa, ona inanırıq".