“Turan Tovuz”un hücumçusu: “Mən Viktor Osihmen deyiləm” (MÜSAHİBƏ)

“Turan Tovuz”un hücumçusu Otto Con Futbolxeber.az saytına müsahibə verib.

- İlk matçda “Araz-Naxçıvan”a 3 qol vursaz da, “Qarabağ”la matçda qapınızda əksi oldu, qapınızda 3 qol gördüz. Bunu nə ilə əlaqələndirmək olar?

- Çox güclü rəqibə qarşı oynadıq. “Qarabağ”la qarşılaşmanın çətin olacağı öncədən də məlum idi. Bacardıqca rəqibi təzyiq altında saxlamağa çalışdıq. Ancaq bu, futboldur, bəzən səhvlər edirsən. Bu səhvlərin cəzasını ağır ödədik.

- “Turan Tovuz”un yeni transferlərindənsiz. İlk iki turdakı çıxışınız sizi qane edir?

- Mən bundan da artığını bacararam. İnkişaf üçün öz üzərimdə çalışıram. Həmişə bacardığından artığını etməlisən.

- "Turan Tovuz"da əsas hədəfiniz nədir?

- Komandanın nailiyyətləri üçün öz töhfəmi verməyə çalışıram. Daha faydalı oyunçu olmaq üçün səylərimi əsirgəmirəm. Məqsədimiz həmişə uğurlu nəticələr əldə etməkdir. Rəqiblərə qol vurmaq bir oyunçu kimi başlıca hədəfimdir.

- "Turan Tovuz" yayda heyətini xeyli gücləndirdi. Mütəxəssislər klubun avrokuboklar uğrunda mübarizə aparmaq gücündə olduğunu bildirirlər. Sizcə, bu, nə dərəcədə realdır?

- Çempionata yeni başlamışıq. Qarşıda bizi uzun bir marafon gözləyir. Gələcəkdə bu barədə dəqiq nəsə demək olar. Addım-addım bunun üçün çalışırıq.

- Sosial şəbəkələrdə sizi "Napoli"nin hücumçusu Viktor Osihmenə bənzədirlər. Azərbaycan çempionatının Osihmeni olmaq üçün iddialısınız?

- Bu, mümkün deyil. Mən Osihmen deyiləm. Mən özüm olaraq performansımla ən yaxşısını etmək üçün cəhd edirəm. Gələcəkdə nə baş verəcəyini birlikdə görəcəyik.

Azad NURİYEV