“Bu dönəmdə “Neftçi” üçün yaxşı oyundan daha çox yaxşı nəticə vacibdir”

“Neftçi” “Jelezniçar”a qarşı səfərdə pis oyun nümayiş etdirmədi. Nəzərə alsaq ki. komandaya həm yeni baş məşqçi, həm də yeni oyunçular gəlib, bu dönəmdə klub üçün yaxşı oyundan daha çox yaxşı nəticə vacibdir”.

Futbolxeber.az saytına müsahibəsində bu sözləri milli komandamızın məşqçisi Arif Əsədov "Neftçi"nin UEFA Konfrans Liqasının təsnifat mərhələlərindəki çıxışları barədə danışarkən deyib.

Təcrübəli mütəxəssis qeyd edib ki, “ağ-qaralar” bu mərhələni uğurla adlamalıdı: “Səfərdə qazanılan 2:2 hesabı evdəki oyun üçün "Neftçi"yə əlavə stimuldur. Düşünürəm ki, "Neftçi" bu turu keçməlidir. Eşitdiyimə görə, stadion dolu olacaq. Azarkeş amili də "Neftçi"yə əlavə güc verəcək. Bu baxımdan "Neftçi"nin şansını yüksək qiymətləndirirəm”.

A.Əsədov son günlər “Neftçi”də baş verən dəyişikliklər də söz açıb: “Gözümüzü açandan "Neftçi"də böyümüşük. Komandanın tələblərini bilirik. "Neftçi" daim yüksək yerlər uğrunda mübarizə aparır. Daim nəticə qazanan komandadır. Burada rəhbərlik, məşqçi, heyət daim təzyiq altında olurlar. Müəyyən uğursuzluq zamanı, idarəetmədə dəyişikliklər qaçınılmazdır. Bu baxımdan baş verən dəyişiklikləri normal qarşılayıram. Arzulayırıq ki, "Neftçi" hazırki strategiya ilə davam edib gələcəkdə uğurlara imza atsın”.

O, hazırkı "Neftçi"nin Konfrans Liqasının qrup mərhələsində oynamaq perspektivini belə dəyərləndirib: “Mutunun rəhbərliyi altında "Neftçi"nin Konfrans Liqasının qrup mərhələsinə düşmək barədə nəsə demək hələ ki çətindir. Komandada istək, motivasiya var. Məşqçinin hərəkətləri, emosiyası nəticə əldə etmək arzusunda olduğunu göstərir.  Amma bütün bunların bəhrəsini gələcəkdə görəcəyik. Yeni transferlərin qarşıdakı oyunlarda vəziyyəti, gücü, yerli və əcnəbi futbolçuların birliyi məsələsini bizə zaman göstərəcək”.

Azad NURİYEV