Ayxan Abbasov: “Premyer Liqada qalmaq üçün vacib qələbə idi”

“Bizim üçün önəmli oyun idi. Kubokdakı məğlubiyyətdən sonra futbolçuları bu oyuna kökləmək çətin idi. Çünki qışdan bu yana kuboka daha çox köklənmişdik. Bir az stresdəydik. Final oynamağı çox istəyirdik. Sevindirici haldı ki, qısa vaxtda futbolçular bugünkü matça motivasiya ola bildilər”.

Futbolxeber.az saytının məlumatına gröə. bu sözləri “Turan Tovuz”un baş məşqçisi Ayxan Abbasov Azərbaycan Premyer Liqasının 32-ci turunda “Zirə”ni 3:1 hesabı ilə məğlub etdikləri matçdan sonra deyib.

Abbasov cari mövsüm əvvəlki 3 oyunun hamısında “Zirə”yə uduzduqlarını xatırladıb: “Gərgin qarşılaşma alındı. Buna qədər hər 3 oyunda “Zirə”yə uduzmuşduq. Zirə səfəri çətin olsa da, bugün qalib gəlməyi çox istəyirdik. Maraqlı, dinamik matç alındı. Əsas odur ki, oyundan qopmadıq. Futbolçularımız standart vəziyyətləri yaxşı dəyərləndirdilər. Komandamızı təbrik edirəm”.

Mütəxəssis qazanılan qələbəni klub rəhbərliyinə həsr edib: “Həm turnir cədvəlindəki yerimizi qorumaq, həm də Premyer Liqada qalmaq üçün vacib qələbə idi. Qarşıdakı 4 oyun bizim gələcəyimiz üçün vacibdi. Sona qədər altıncı pillədəki mövqeyimizi qorumaq üçün əlimizdən gələni edəcəyik. Azarkeşlərimizi təbrik edirəm. Rəhbərliyə təşəkkür edirəm ki, son 1 həftədə komandanın arxasında durdular, motivasiya etdilər. Məncə, bu qələbəni onlara həsr etmək olar”. 

“Kubokda “Neftçi”yə qarşı da belə oyun sərgiləsəz, yaxşı olmazdı”mı sualını A.Abbasov belə cavablandırıb:  “Gəlin, kubokla çempionatı bir-birinə qatışdırmayaq. Çünki “Neftçi” ilə səfər oyununa necə hazırlaşdığımızı heç kim bilmir. Bilirəm ki, bəziləri bizi qınayır. Buna normal yanaşıram. Oyundan sonra müzakirələr olmalıdı. “Neftçi” ilə oyunda 70-ci dəqiqəyə kimi hər şey yaxşı gedirdi, hücuma da çıxırdıq. Hücumda çoxala bilməməyimizin səbəbi rəqib idi. Lakin 70-ci dəqiqədən sonra oyunun stressi öz sözünü dedi, futbolçularımız o yükü daşıya bilmədilər. Bəzi mütəxəssilərin fikirləri mənə ağır gəlir. Çünki həmin mütəxəssislər “Turan Tovuz”dan güclü komandalarda işləyiblər, amma hücum futbolunu görməmişik. Üstəlik, həmin komandaları I dəstəyə salıblar. Bu gün oyun qurtarandan sonra rahat şəkildə “mən olsaydım hücum futbolu oynadardım” demək... Bir qədər bu fikirlər adama təsir edir. Qalan hər kəsin fikrinə normal yanaşıram. Bəli, razıyam ki, “Neftçi”yə qarşı belə oynasaydıq, turu keçərdik. Deməli, belə oynamaq üçün çalışmaq lazımdı”.

Mütəxəssis bəzi futbolçuların “Neftçi” ilə oyundan öncə pul söhbətləri etmələrinə görə vacib matçda uduzmaları barədə deyilənlərlə razılaşmayıb: “Futbolçuların mənimlə, yaxud rəhbərliklə maaş söhbəti etmələri haqda deyilənlər həqiqəti əks etdirmir. Bu gün futbolçuların üzərinə çox da gedə bilmərəm. Çünki bu futbolçular klubun büdcəsi bilinməyəndə, sponsor olmayanda “Turan Tovuz”a gəliblər. Şükür Allaha, bu gün klubun hər şeyi varsa, heç bir narazıçılıq ola bilməz. Bəli, bəzi futbolçularla yeni mövsüm barədə danışığımız olub, razılaşmışıq. Bəziləri gözləmə mövqeyindədi. Bu da normaldı. Eyni hal “Neftçi”də də yaşanır, “Qarabağ”da da. Heç bir futbolçu ilə pul söhbətimiz olmayıb”.