“Torino” Musa Qurbanlı ilə maraqlanır?

"Qarabağ"ın və millimizin hücumçusu Musa Qurbanlı karyerasını İtaliyada davam etdirə bilər.

Futbolxeber.az saytının məlumatına görə, gənc istedad axtarışında olan A seriyası təmsilçisi "Torino"da diqqətlər Qurbanlıya yönəlib.

İtaliya mətbuatının iddiasına görə, bu işlə Turin klubunun idman direktoru və skaut şöbəsinin rəhbəri Davide Vaqnati özü məşğul olur.

"Torino"nun xorvat baş məşqçisi İvan Yuriçin komandaya Balkan ölkələrindən bir neçə istedadlı oyunçu gətirdiyi və yeni kəşflər axtarışında olduğu bildirilib.

İtaliyanın "Tutto Mercato" nəşrində isə Musa Qurbanlının bu mövsüm Premyer Liqada 20 qol vuraraq komandasını çempionluğa doğru aparması, "Torino"nun sabiq çalışdırıcısı Canni De Byazinin baş məşqçisi olduğu Azərbaycan millisində də debüt etməsi və qol vurması qeyd olunub.

Xəbərdə 21 yaşlı hücumçu ilə Türkiyə klublarının da maraqlandığı vurğulanıb.

"Qarabağ"ın baş məşqçisi Qurban Qurbanovun oğlu olan Musanın Ağdam klubu ilə 2026-cı ilin yayına qədər müqaviləsi var. O, bu mövsüm Azərbaycan Premyer Liqasında 26 oyuna 20 qol vurub, 7 qol ötürməsi edib.