Şahin Diniyev: “Bizim lehimizə ola biləcək məqamlarda VAR-a baxılmır”

“Belə dramatik oyundan sonra danışmaq çətindi. Oyun baxımından nə isə müzakirə etmək yersiz görünür. Çünki komandamız üçün matç ərzində çox neqativ hallar yaşandı”.

Futbolxeber.az saytının məlumatına görə, bu sözləri "Səbail"in baş məşqçisi Şahin Diniyev Azərbaycan Premyer Liqasının XXV turunda "Sumqayıt"a 0:1 hesabı ilə uduzduqları oyundan sonra deyib.

Mütəxəssis hakimlərdən narazılıq edib: "Hakimlər hər dəfə qapımıza penalti təyin edirlər, qırmızı vərəqə göstərirlər. Amma bizim epizodlarda heç vaxt VAR- baxmağa getmirlər. Günahı kiminsə üzərinə atmaq istəmirəm. Özümüz də bu gün ən zəif oyunlarımızdan birini keçirdik. İkinci hissədə toplarlanmaq istəyirdik ki, azlıqda qaldıq. Orta xətdə, irəlidə problem var idi. Qırmızı vərəqə bütün planlarımızı pozdu".

Diniyev qeyd edib ki, hakimlərlə bağlı narazılığı təkcə bu oyuna görə deyil: “Şamaxı” və "Neftçi" ilə oyunlarda verilən penaltilər düzgün deyildi. Qapıya təhlükə olmayan epizodda əl açılması normaldı. Problem VAR-dadı. Bu gün bir epizod var idi, künc zərbəsindən sonra, amma baxılmadı. Nədənsə bizim lehimizə ola biləcək məqamlarda VAR-a baxılmır. Mən də insanam əsəblərim dözmür. Ona görə də hakim qapımıza penalti təyin edən kimi meydanı tərk etdim. Çox qəribə bir situasiya yaranıb. Bu qədər olmaz. 6 oyunda qapımıza 4 penalti təyin edilib".

O, görüşün heç-heçəlik olduğunu vurğulayıb: "Heç-heçəlik oyun idi. Özümüzdə də günah var ki, yaxşı oynaya bilmədik. Amma meydanda baş verənlər komandaya təsirini göstərir. 3 əvəzetmədən sonra azlıqda qaldıq və geriyə yol yox idi. Hər şeyi hakimlərin üstünə atmıram"

Məğlubiyyətə baxmayaraq, Diniyev Premyer Liqada qalacaqlarına əminliyini ifadə edib: "Həyat davam edir. Qarşıda 12 oyun var. Potensiala bələdəm. Sözümün arxasındayam, komanda sonuncu yerdə olmayacaq. 36-cı turda yenidən bu mövzuya qayıdarıq".

İbrahim CƏFƏROV