AFFA erməni təxribatının qarşısını almaq üçün lazımi addımları atacaq - AÇIQLAMA

“AFFA həmişə milli komandanın istənilən səfər oyunundan öncə matçın keçiriləcəyi ölkədəki səfirliyə məktubla müraciət edir, oyunla bağlı məlumat verir və müvafiq tədbirlərin görülməsini xahiş edir”.

Futbolxeber.az saytına açıqlamasında bu sözləri AFFA-nın İnformasiya və İctimaiyyətlə Əlaqələr Departamentinin rəhbəri Firuz Abdulla deyib.

Bu gün məlum olub ki, İsveçdəki erməni icmasının üzvləri martın 27-də futbol üzrə Avropa çempionatının seçmə mərhələsi çərçivəsində bu ölkənin Stokholm şəhərində keçiriləcək İsveç - Azərbaycan matçında təxribat törətməyi planlaşdırırlar.

F.Abdulla bildirib ki, AFFA erməni təxribatının qarşısını almaq üçün lazımi addımları atacaq:

“Belə bir informasiya ortaya çıxdıqdan sonra təbii ki, AFFA tərəfindən UEFA-ya və İsveç Futbol Federasiyasına müraciət olunacaq. Eyni zamanda İsveçdəki səfirliyimizə də. Ümid edirik ki, hər hansı bir insident, problem yaşayanmayacaq”.