Samir Abasov: “İkinci qol oyunun qırılma nöqtəsi oldu”

“Açığı, bu nəticəyə görə üzülürük. Fikirləşirəm ki, qapımızda gördüyümüz ikinci qol oyunun qırılma nöqtəsi oldu. Fasilədə futbolçuları yaxşı motivasiya etmişdik. Lakin ikinci qoldan sonra demək olar ki, hər şey qırıldı. Düzdür, hesab arasındakı fərqi azaltdıq. Lakin qolu gec vurduq”.

Futbolxeber.az saytının məlumatına görə. bu sözləri “Sumqayıt”ın baş məşqçisi Samir Abasov Azərbaycan Premyer Liqasının 23-cü turunda “Qəbələ”yə 1:2 hesabı ilə uduzduqları oyundan sonra deyib.

Təcrübəli mütəxəssis qeyd edib ki, buraxılan ikinci qol komandasını “sındırıb”: “Bu, “Zirə” ilə oyunda da başımıza gəldi. 1 mövqedə 2 oyunçu itirmək heç də xoş deyil. İkinci hissəyə çıxanda qol vuracağımıza ümidli idik. Əfsuslar olsun ki, ikinci qol komandanı “sındırdı”.

Abasov Qəbələdə oynamağın çətinliyindən söz açıb: “Ümumi götürdükdə ağır oyun keçdi. Qəbələdə oynamaq asan deyil. Matçın ilk dəqiqələrindən çətinlik hiss edirsən. İlk dəfə Qəbələdə meydana çıxan yeni transferlərimiz də yüksəklikdə oynamağın təsirini hiss etdilər”.

O, komandasının birinci hissədə üstün tərəf olduğunu bildirib: “İlk hissədə biz üstün tərəf idik. 2 zərbəmiz dirəkdən dönmüşdü. Rəqibin isə yalnız 1 epizodu oldu, onda da fərqləndilər”.

Abasov matçda rəqibin hesabı açdığı epizodla bağlı dəqiq fikir bildirməyib: “Düzdür, qol epizodu şübhəlidi. Amma epizoda dəqiq baxmaq lazımdı. Baxıb, sonra fikrimizi bildirəcəyik”.

“Sumqayıt”ın çalışdırıcısı növbəti turda onları daha ağır gözlədiyini vurğulayıb: “Təbii ki, bu gün uduzduğumuz üçün məyusuq. Halbuki burdan xalla qayıda bilərdik. Amma əlimizi yanımıza salmağa vaxtımız yoxdu. Hər məğlubiyyət turnir cədvəlində vəziyyəti daha da çətinləşdirir. Növbəti turda evdə “Kəpəz”lə oyunumuz var. Bu görüşə çox ciddi hazırlaşcağıq. Həmin görüş bizim üçün bugünkü matçdan da çətin keçəcək”.

İbrahim CƏFƏROV