“Heç bir komanda xal itkisindən sığortalanmayıb, o cümlədən də “Qarabağ”

“Heç bir komanda xal itkisindən sığortalanmayıb, o cümlədən də “Qarabağ”. Hansısa oyunda “Qarabağ” da xal itirməlidir. Bu, normal bir haldır”.

Futbolxeber.az saytına müsahibəsində bu sözləri milli komandamızın məşqçisi Arif Əsədov deyib.

Ağdam klubunun Premyer Liqanın XXI turunda “Kəpəz”lə səfər oyununda xal itirməsindən (1:1) danışan təcrübəli mütəxəssis bunun bir çox səbəbi olduğunu vurğulayıb: “Biz bilirik ki, Gəncə, Tovuz səfərləri hər bir komanda üçün çətin keçir. Mən futbolçu olan dövrlərdə də belə idi. Qərb bölgəsinin təmsilçiləri turnir cədvəlinin aşağı pilləsində qərarlaşsalar da, “Qarabağ”, “Neftçi” kimi komandalarla oyuna ikiqat motivasiya ilə çıxırlar. “Qarabağ” da dünən bu halla üzləşdi.

“Kəpəz” oyuna çox yaxşı köklənmişdi. Komanda meydanın hər qarışı uğrunda mübarizə aparırdı. Sona qədər “Qarabağ”a öz oyununu göstərməyə imkan vermirdilər. Qazonun durumu da Ağdam klubunun çıxışına təsir göstərirdi. Lakin bu məqam “Kəpəz”in əziyyətini yerə vurmaq kimi anlaşılmamalıdır. Sadəcə ot örtüyünün vəziyyəti topla daha çox topla oynamağı sevən “Qarabağ”ın texnikalı futbolçularına müəyyən qədər çətinlik törədirdi”.

“Qarabağ” hazırda ideal formada olmasa da, Arif Əsədov hesab edir ki, komanda Konfrans Liqasının 1/16 final mərhələsində “Gent”ə qarşı keçirəcəyi oyuna qədər daha yaxşı vəziyyətə gələcək: “Qış fasiləsində Kadi, Ovusu kimi aparıcı futbolçular komandadan getdi. Onların yerinə gələnlərin uyğunlaşması üçün müəyyən qədər zamana ehtiyac var. “Qarabağ”ın futbolçularının hazırda ideal formada olmadığını biz hələ Antalyadakı hazırlıq prosesində də görürdük. İkinci dövrə yenicə start götürüb. Ona görə də digər komandalar kimi, “Qarabağ” da hələ öz oyununu tuta bilməyib. Lakin bütün bunların “Gent”lə oyuna təsir göstərəcəyini düşünmürəm. Qurban müəllim təcrübəli mütəxəssisdir və daha əvvəl də bu cür hallarla üzləşib. Gəncə səfərindəki xal itkisi “Qarabağ”a müsbət təsir göstərəcək. Çünki hardasa büdrəmə olmalıdır ki, komanda daha tez toparlansın. “Gent”lə oyuna müəyyən qədər vaxt var. Ona görə də düşünürəm ki, “Qarabağ” bu vəziyyətdən çıxacaq”.

Millimizin məşqçisi “Qarabağ”ın Premyer Liqanın qarşıdakı turlarında da xal itirmə ehtimalını istisna etməyib: “Təqvim “Qarabağ”ın əleyhinədir. Qarşıda komandanı Premyer Liqada “Sabah”, “Zirə”, “Neftçi” kimi iddialılara çətin oyunlar gözləyir. Üstəlik, “Gent”lə 2 oyun. “Qarabağ” əsas diqqətini məhz Belçika təmsilçisi ilə oyunlara yönəltdiyi üçün qarşıdakı turlarda da xal itkisi mümkündür. Rəqiblər də Ağdam klubunun bu vəziyyətindən faydalanmağa çalışacaqlar”.

İbrahim CƏFƏROV