Baqa: "Çalışacağıq ki, vəziyyətdən çıxaq"

“Nəhayət ki, ilk qolumuzu vurduq. Amma qolu tez vurmaq bizə o qədər də yaxşı təsir etmədi. İlk hissənin sonunda qapımızda qol gördük, sonra da oyunu dəyişə bilmədik”.

Futbolxeber.az saytının məlumatına görə, bu sözləri "Sumqayıt"ın baş məşqçisi Alekssey Baqa Azərbaycan Premyer Liqasının 6-cı turunda bu gün "Şamaxı" ilə keçirilən oyundan sonra mətbuat konfransında deyib. 

- Bu gün çempionatın autsayderini məğlub edə bilmədiniz. Komandanın dirçələcəyinə inanırsız?

- Dirçəliş nəyə deyirsiz? "Sumqayıt" nə vaxtsa çempion olub? Başa düşürəm ki, hazırda pozitiv məqamlar azdır. Amma çalışacağıq ki, bu məqamları düzəldək. Məşqçidən tutmuş oyunçulara qədər hamımız birlikdə komandanın yaxşı oynaması üçün çalışmalıyıq. 

- Nə vaxt istefa verəcəksiniz?

- Belə bir şey baş versə, hamınız görəcəksiniz. Amma indiki məqamda bunu deyə bilmərəm. 

- Belə bir fikir var ki, legionerləri siz seçməmisiniz, rəhbərlik transfer edib. Bu haqda nə deyə bilərsiniz?

- Şayiələr barədə mənim nəsə deməyim doğru deyil. Komandaya kim gəlibsə, onlarla işləmək məcburiyyətindəyəm. Mənim işim komandanı məşq etdirməkdir. Legionerləri sadəcə baş məşqçi seçmir. Rəhbərlik, skautlar və biz birlikdə qərar veririk. Kiminlə müqavilə imzalanıbsa, mənim də fikrim soruşulub. Hamımız birlikdə qərar veririk.

- Üç real qol vəziyyətindən futbolçularınız yararlana bilmədi. Bu, bəxtsizlikdir, yoxsa ustalıq səviyyəsinin aşağı olması?

- Bunu sadəcə bəxtsizliyə bağlamaq düzgün olmaz. Çünki bura peşəkar klubdur və altıncı turdur ki, qol vura bilmirik. Bunun kompleks səbəbləri var. Bəzən rəqib qapıçı və müdafiəçilər yaxşı oynayır. Peşəkar futbolda bunu bəxtsizliklə əlaqələndirmək düzgün deyil. 

- İndiyə kimi çalışdığınız klublarda belə vəziyyətlə üzləşmisiz?

- Belə vəziyyətlə ilk dəfədir ki, rastlaşıram. Çalışacağıq ki, vəziyyətdən çıxaq.