Kramarenko millimizdən ayrıldı

Milli komandamızın qapıçılar üzrə məşqçisi Dmitri Kramarenko yığmadakı işindən ayrılıb.

Futbolxeber.az saytının məlumatına görə, bu haqda o, özü Rusiya mətbuatına açıqlama verib.

Moskva ÇSKA-sının məşqçilər korpusunda yer alan Kramarenko artıq iki yerdə çalışmaq istəmədiyini deyib.

O, bundan sonra yalnız klubda işləyəcəyini bildirib: "Ötən gün bu məsələ ilə bağlı qərar verdim. Artıq yalnız ÇSKA-da çalışacağam. Diqqətimi sırf klubdakı işimə yönəldəcəyəm. ÇSKA iki yerdə işləməyimin əleyhinə deyildi. 6 ay bu formada işlədim. Ancaq millidə prinsiplər və qaydalar fərqlidir.

Milli komanda mənim üçün əziz olaraq qalır. Mən Azərbaycanda doğulub, böyümüşəm. İndi belə bir qərar verdik, amma hər an milliyə kömək etməyə şad olaram. Yəqin ki, bu, doğru qərardır. Baxmayaraq ki, klubda da çox sayda səyahət və məşqlər var, indi ailəmlə daha çox vaxt keçirirəm".

Qeyd edək ki, Dmitri Kramarenko bu ilin yanvarından ÇSKA-da işləyir. 2020-ci ildən yığmamızın məşqçilər korpusunda yer alan keçmiş qolkiper daha əvvəl “Neftçi” və “Qəbələ”də də məşqçi kimi çalışıb.